തിരുവനന്തപുരം: വിജെടി ഹാളിനു നവോത്ഥാന നായകന് മഹാത്മാ അയ്യങ്കാളിയുടെ പേര് നല്കണമെന്ന ബിജെപിയുടെ നിരന്തരമായ ആവശ്യത്തിന് മുഖ്യമന്ത്രിയുടെ പച്ചക്കൊടി. തലസ്ഥാന നഗരിയില് തല ഉയര്ത്തി നില്ക്കുന്ന വിജെടി ഹാള് എന്ന് അറിയപ്പെടുന്ന വിക്ടോറിയ ജൂബിലി ടൗണ്ഹാളിന്റെ പേര് മാറ്റി അയ്യങ്കാളിയുടെ നാമം നല്കണമെന്ന ബിജെപിയുടെ വര്ഷങ്ങളായ ആവശ്യത്തിനാണ് മുഖ്യമന്ത്രി ഗത്യന്തരമില്ലാതെ സമ്മതം മൂളിയത്.
അയ്യങ്കാളി ജയന്തി ദിനമായ ഇന്നലെ മുഖ്യമന്ത്രിയ്ക്ക് ഒ. രാജഗോപാല് എംഎല്എ നല്കിയ നിവേദനത്തിലൂടെ ബിജെപി ഈ ആവശ്യം വീണ്ടും ഉന്നയിച്ചിരുന്നു. തുടര്ന്ന് വിജെടി ഹാളില് നടന്ന കെഡിഎഫിന്റെ അയ്യങ്കാളി ജയന്തി ദിനാഘോഷ ചടങ്ങിന്റെ ഉദ്ഘാടനം നിര്വ്വഹിച്ചുകൊണ്ട് പേരുമാറ്റം പ്രഖ്യാപിച്ചത്. ബ്രിട്ടീഷ് രാജ്ഞിയായിരുന്ന അലക്സാണ്ട്രിനാ വിക്ടോറിയയുടെ പേരിലായിരുന്നു തിരുവനന്തപുരത്തെ ഈ ഹാള് ഇതുവരെ അറിയപ്പെട്ടത്. വിക്ടോറിയ മഹാറാണി കിരീട ധാരണം ചെയ്തതിന്റെ അന്പതാം വാര്ഷികത്തിന്റെ തിരുശേഷിപ്പ് എന്തിന് നാം ചുമക്കണം?. തിരുവനന്തപുരത്തിന്റെ ഹൃദയ ഭാഗത്ത് വിജെടി ഹാള് എന്ന ഓമനപ്പേരില് അറിയപ്പെടുന്ന വിക്ടോറിയാ ജൂബിലി ടെര്മിനല് ഹാള് അടിമത്തത്തിന്റെ ചിഹ്നമാണ്. ഇത് അടിയന്തിരമായി പുനര്നാമകരണം ചെയ്യണമെന്നായിരുന്നു ബിജെപി മുഖ്യമന്ത്രിക്ക് നല്കിയ നിവേദനത്തില് ചൂണ്ടിക്കാട്ടിയത്. ഈ ആവശ്യം ഒടുവില് മുഖ്യമന്ത്രി അംഗീകരിക്കുകയായിരുന്നു.
വിക്ടോറിയ മഹാറാണിയുടെ കിരീട ധാരണത്തിന്റെ അന്പതാം വാര്ഷികത്തിന്റെ സ്മാരകമായാണ് തലസ്ഥാന നഗരിയിലെ കലാ, സാംസ്ക്കാരിക കേന്ദ്രത്തിനു വിജെടി ഹാള് എന്ന പേര് നല്കിയത്. അതിന് മുമ്പു തന്നെ ബിജെപി മഹാത്മാ അയ്യന്കാളിയുടെ പേര് നല്കണമെന്ന ആവശ്യം ഉയര്ത്തിയിരുന്നു.
