തിരുവനന്തപുരം: പ്രളയത്തിന്റെ പശ്ചാത്തലത്തില് ഒരു വശത്ത് ദുരിതാശ്വാസ നിധി സ്വരൂപണവും സാമ്പത്തിക പ്രതിസന്ധിയുടെ പേരില് ചെലവുകുറയ്ക്കാല് ആഹ്വാനവും പൊടിപൊടിക്കുമ്പോള് മറുവശത്ത് പിണറായി സര്ക്കാരിന്റെ ധൂര്ത്തിന്റെ പുതിയ റിപ്പോര്ട്ടുകളും പുറത്ത്. മുഖ്യമന്ത്രിയുടെയും മന്ത്രി എ.സി. മൊയ്തീന്റേയും ഓഫീസ് നവീകരിക്കുന്നതിന് 80 ലക്ഷം രൂപയാണ് പൊതു ജഖനാവില് നിന്നും സര്ക്കാര് ചെലവഴിച്ചതെന്ന രേഖകള്ക്കു പിന്നാലെയാണു ഒന്നരക്കോടിയിലധികം രൂപയുടെ അടുത്ത ധൂര്ത്തിന്റെ കണക്കുകളും പുറത്തുവരുന്നത്.
സംസ്ഥാന മന്ത്രിസഭയുടെ ആയിരം ദിനാഘോഷത്തോടനുബന്ധിച്ച പ്രചാരണ പരിപാടികള്ക്കായി ഫോള്ഡര് അച്ചടിക്കാന് ചെലവാക്കിയത് ഒന്നരകോടിയിലധികം രൂപയെന്നു രേഖകള്. ‘ഇനി നവകേരളത്തിലേക്ക്’ എന്ന പേരില് 75 ലക്ഷം കോപ്പികളാണ് സ്വകാര്യ പ്രസുകളില് അച്ചടിച്ചത്. ആകെ ചെലവായ 1,34,67,784 രൂപയുടെ 50 ശതമാനമായ 67,33,892 രൂപ അനുവദിച്ചു കൊണ്ടുള്ള ഉത്തരവ് പുറത്തിറങ്ങിയിട്ടുണ്ട്. 50% തുക നേരത്തെ അനുവദിച്ചിരുന്നു. പ്രചാരണ പരിപാടികള്ക്കായി ഫോള്ഡര് (ഇനി നവകേരളത്തിലേക്ക്) , പോസ്റ്റര് (ഒന്നാണ് നാം, ഒന്നാമതാണ് കേരളം), പുസ്തകങ്ങള് ( പറഞ്ഞതെല്ലാം ചെയ്തു നിറഞ്ഞു ഇനി നവകേരള നിര്മാണം), നവകേരളത്തിന്റെ നയരേഖകള് , നവകേരളത്തിനായുള്ള നവോത്ഥാനം , അതിജീവനം ഡോക്യുമെന്ററി ഫെസ്റ്റിനുവേണ്ടി പോസ്റ്റര്- അതിജീവനം , പുസ്തകം-അതിജീവനം ഡോക്യുമെന്ററി ഫെസ്റ്റ് എന്നിവ അച്ചടിക്കുന്നതിന് എംപാനല്ഡ് പ്രസുകളില്നിന്ന് ക്വട്ടേഷന് ക്ഷണിച്ചിരുന്നു സ്വകാര്യ പ്രസുകള് നല്കിയ ഇന്വോയിസുകള് അനുസരിച്ച് ഫോള്ഡറിന്റെ അച്ചടിക്കൂലിയുടെ 50 ശതമാനമായ 67,33,892 രൂപയും പോസ്റ്ററിന്റെ കൂലിയായ 85,400രൂപയും, പുസ്തകങ്ങളുടെ അച്ചടിക്കൂലിയായ 3,31,950 രൂപയും പ്രസുകള്ക്ക് അനുവദിച്ചു.
അതിജീവനം ഡോക്യുമെന്ററി ഫെസ്റ്റുമായി ബന്ധപ്പെട്ട് അച്ചടിച്ച പോസ്റ്റര്, പുസ്തകം എന്നിവയുടെ അച്ചടിക്കൂലി നല്കിയിയിരുന്നില്ല. പോസ്റ്റര് അടിച്ച ഇനത്തില് 19,550 രൂപയും അതിജീവനം ഡോക്യുമെന്ററി ഫെസ്റ്റ് എന്നപേരില് പുസ്തകം അച്ചടിച്ചതിന് 1,39,700 രൂപയുടെയും ഇന്വോയിസുകള് പ്രസുകള് സമര്പ്പിച്ചു.
ഫോള്ഡറിന്റെ അച്ചടിക്കൂലിയിനത്തില് ബാക്കി നല്കാനുള്ള 50% തുകയും ഡോക്യുമെന്ററി ഫെസ്റ്റിന്റെ പോസ്റ്ററുകളും പുസ്തകങ്ങളും അച്ചടിച്ച തുകയും അനുവദിക്കണമെന്ന് പിആര്ഡി ശുപാര്ശ നല്കി. ഇതനുസരിച്ചാണ് ഫോള്ഡറിന്റെ ബാക്കി നല്കാനുള്ള 67,33,892 രൂപ അധികമായി വകയിരുത്താനും, ഡോക്യുമെന്ററി ഫെസ്റ്റിന്റെ പോസ്റ്ററുകളും പുസ്തകങ്ങളും അച്ചടിച്ച തുക അനുവദിക്കാനും ഉത്തരവിറങ്ങിയത്. നേരത്തേ, തോറ്റ എംപി സമ്പത്തിനെ ദല്ഹിയില് ക്യാബിനറ്റ് പദവിയില് നിയമിക്കുകയും വേലപ്പന് നായരെ വന് ശമ്പളത്തില് ലേസണ് ഓഫീസറായി നിയമിക്കുകയും ചെയ്തതിനു പിന്നാലെയാണ് വീണ്ടും മുഖ്യമന്ത്രി വീണ്ടും അധിക ചെലവ് വരുത്തിവെച്ചിരിക്കുന്നത്. ധനവകുപ്പിന്റെ എതിര്പ്പ് തള്ളി രണ്ട് പുതിയ ഇന്നോവാ ക്രിസ്റ്റ കാര് വാങ്ങാന് 45ലക്ഷം രൂപ അനുവദിച്ചതും അടുത്തിടെയാണ്.മുഖ്യമന്ത്രിയുടെ ഓഫീസ് നവീകരിക്കാന് മാത്രം ചെലവാക്കിയത് 39 ലക്ഷം രൂപയാണ്. മൊയ്തീന് വേണ്ടി അനക്സ് വണ്ണില് തയ്യാറാക്കിയ മുറിയിലെ ഇലക്ട്രിക് ജോലികള്ക്കായി ചെലവായത് പന്ത്രണ്ടര ലക്ഷം രൂപയും. സിവില് ജോലിക്ക് 27,97000 ലക്ഷം രൂപയും ചെലവഴിച്ചു. രണ്ട് ഓഫീസുകളുടേയും നിര്മാണ ചുമതല ഊരാളുങ്കല് ലേബര് കോണ്ട്രാക്റ്റ് കോ ഓപ്പറേറ്റീവ് സൊസൈറ്റിക്കാണ് നല്കിയിട്ടുള്ളത്. പ്രളയത്തിലും മഴക്കെടുതിയിലും വീട് പൂര്ണ്ണമായി തകര്ന്നവര്ക്ക് വീട് നിര്മിക്കാന് നാല് ലക്ഷം രൂപയാണ് സര്ക്കാര് സഹായം നല്കുന്നത്. ഇത് പരിഗണിച്ചാല് 20 വീടുകള്ക്ക് വേണ്ട തുകയാണ് രണ്ട് മന്ത്രി ഓഫീസ് മാറ്റങ്ങള്ക്കായി സര്ക്കാര് ഖജനാവില് നിന്ന് ചിലവാക്കുന്നതെന്നാണ് പ്രധാന വിമര്ശനം.
