കൊച്ചി: മലങ്കര സഭാതര്ക്കത്തില് സമവായ ചര്ച്ചയ്ക്കുള്ള സംസ്ഥാന സര്ക്കാരിന്റെ ഉത്തരവ് ഓര്ത്തഡോക്സ് സഭ വീണ്ടും നിരസിച്ചു. സുപ്രീംകോടതി ഉത്തരവ് നടപ്പാക്കാതെ സമവായചര്ച്ചയ്ക്ക് എത്തണമെന്ന സര്ക്കാരിന്റെ നിര്ദ്ദേശം അംഗീകരിക്കാനാവില്ലെന്നാണ് ഒര്ത്ത്ഡോക്സ് സഭ നിലപാട് സ്വീകരിച്ചിരിക്കുന്നത്.
1934ലെ ഭരണഘടനയുമായി ചര്ച്ചയ്ക്ക് എത്തണമെന്നാണ് സര്ക്കാര് ഓര്ത്തഡോക്സ് സഭയോട് ആവശ്യപ്പെട്ടിരുന്നത്. പള്ളിത്തര്ക്കത്തില് തങ്ങള്ക്കനുകൂലമായി സുപ്രീംകോടതിയില് നിന്ന് വിധി വന്നിട്ടുള്ളതാണ്. ആ വിധി നടപ്പാക്കുകയാണ് സര്ക്കാര് ഇനി ചെയ്യേണ്ടത്. ഭരണഘടനയൊക്കെ സുപ്രീംകോടതി നേരത്തെ പരിശോധിച്ചതാണ്. അതിന്റെ അടിസ്ഥാനത്തിലാണ് വിധി പ്രസ്താവിച്ചത്. ഈ സാഹചര്യത്തില് വീണ്ടും ഭരണഘടന ഹാജരാക്കണമെന്ന സര്ക്കാര് ഉത്തരവ് നീതിയുക്തമല്ലെന്നും സഭ സര്ക്കാരിന് നല്കിയ മറുപടി കത്തില് പറയുന്നുണ്ട്.
നിലവിലെ സര്ക്കാരിന്റെ നീക്കങ്ങള് സുപ്രീംകോടതി വിധിയുടെ ലംഘനമാണ്. സര്ക്കാരിനെതിരെ കോടതിയലക്ഷ്യ ഹര്ജി നല്കാനുള്ള തീരുമാനവുമായി മുന്നോട്ടുനീങ്ങാനാണ് തീരുമാനിച്ചിരിക്കുന്നതെന്നും സഭ സര്ക്കാരിനെ അറിയിച്ചിട്ടുണ്ട്.
