തൃശൂര്: സിപിഎം ഭരിക്കുന്ന കേരള സംഗീത നാടക അക്കാദമി സെക്രട്ടറിക്കെതിരെ സിഐടിയുവിന്റെ നേതൃത്വത്തില് ജീവനക്കാരുടെ പ്രതിഷേധം. അക്കാദമി സെക്രട്ടറി എന്.രാധാകൃഷ്ണന് നായര്ക്കെതിരെയാണ് സിഐടിയു നിയന്ത്രണത്തിലുള്ള അക്കാദമിക് എംപ്ലോയീസ് യൂണിയന്റെ നേതൃത്വത്തില് പ്രതിഷേധിച്ചത്.
ജീവനക്കാര്ക്ക് അര്ഹമായ സ്ഥാനക്കയറ്റം നല്കുന്നില്ല, തൊഴിലാളി വിരുദ്ധ നിലപാട് സ്വീകരിക്കുന്നു, ജീവനക്കാരുടെ തൊഴിലവസരങ്ങള് കവര്ന്നെടുക്കുന്നുവെന്നുമാണ് യൂണിയന്റെ ആരോപണം. അക്കാദമിയില് യുഡി ക്ലര്ക്കായി പ്രവര്ത്തിക്കുന്ന യൂണിയനില്പ്പെട്ട ജീവനക്കാരന് പ്രമോഷന് നല്കാത്തതാണ് സിഐടിയുവിനെ ചൊടിപ്പിച്ചത്.
നിരവധി തവണ സ്ഥാനക്കയറ്റത്തിന് അപേക്ഷ നല്കിയെങ്കിലും നടപടിയുണ്ടായില്ലെന്ന് യൂണിയന് ഭാരവാഹികള് കുറ്റപ്പെടുത്തി. 20 വര്ഷമായി യുഡി ക്ലര്ക്കായി ജോലി ചെയ്യുന്ന ജീവനക്കാരന് ഉടനെ ജൂനിയര് സൂപ്രണ്ടായി സ്ഥാനക്കയറ്റം നല്കണമെന്നാവശ്യപ്പെട്ടാണ് യൂണിയന് പ്രതിഷേധം സംഘടിപ്പിച്ചത്.
അര്ഹമായ ഒഴിവുകളില് ജീവനക്കാര്ക്ക് നിയമനം നല്കാതെ ഡെപ്യൂട്ടേഷന് നിയമനം നടത്തുകയാണെന്നും സെക്രട്ടറിയുടെ തന്നിഷ്ടമാണ് അക്കാദമിയിലെന്നും ജീവനക്കാര് ആരോപിച്ചു. സിഐടിയു ഏരിയാ സെക്രട്ടറി ടി. സുധാകരന് പ്രതിഷേധ സമരം ഉദ്ഘാടനം ചെയ്തു. തെറ്റുതിരുത്തിയില്ലെങ്കില് അക്കാദമിയില് നിന്ന് പുറത്തിറങ്ങാന് സെക്രട്ടറിയെ അനുവദിക്കില്ലെന്ന് സുധാകരന് മുന്നറിയിപ്പ് നല്കി.
അതേസമയം, താനടക്കമുള്ളവരെ ഡെപ്യൂട്ടേഷനിലാണ് സര്ക്കാര് നിയമിച്ചതെന്നും ജീവനക്കാര് നല്കിയ പരാതി അടുത്ത എക്സി. കമ്മിറ്റിയില് ചര്ച്ച ചെയ്യുമെന്നും അക്കാദമി സെക്രട്ടറി എന്. രാധാകൃഷ്ണന് നായര് ജന്മഭൂമിയോട് പറഞ്ഞു.
