കൊച്ചി: ഏറ്റവും മാരകമായ, കോടികള് വിലമതിക്കുന്ന ലഹരിവസ്തു കൊച്ചിയില് നിന്ന് പിടികൂടി. പൊന്നാരിമംഗലത്തു നിന്നാണ് കാലിഫോര്ണിയ-9 എന്നറിയപ്പെടുന്ന 25 ത്രീ ഡോട്ടട് എല്എസ്ഡി സ്റ്റാമ്പ് (540 മില്ലി ഗ്രാം) പിടികൂടിയത്. കീഴ്മാട് സ്വദേശി ഇടയത്താളില് വീട്ടില് സഫര് സാദിഖാ(24)ണ് അറസ്റ്റിലായത്.
ഒരു സ്റ്റാമ്പില് 360 മൈക്രോഗ്രാം ലൈസര്ജിക് ആസിഡ് അടങ്ങിയിട്ടുണ്ട്. 36 മണിക്കൂര് വരെയാണ് ഇതിന്റെ വീര്യം. നിലവില് ഇന്ത്യയില് ഉപയോഗിക്കുന്ന ഏറ്റവും വീര്യംകൂടിയ ത്രീ ഡോട്ടഡ് സ്റ്റാമ്പാണിത്. സ്റ്റാമ്പിന്റെ പുറകിലുള്ള ഡോട്ടുകളുടെ എണ്ണമാണ് വീര്യത്തെ സൂചിപ്പിക്കുന്നത്. നാക്കിലും ചൂണ്ടിനുള്ളിലും ഒട്ടിച്ച് ഉപയോഗിക്കുന്ന ഇവയുടെ അളവ് അല്പ്പം കൂടിയാല് തന്നെ മരണപ്പെടാനുള്ള സാധ്യതയും കൂടുതലാണ്.
ഗോവയില് കേന്ദ്രീകരിച്ചിരിക്കുന്ന ഡ്രഗ് മാഫിയയാണ് ഇതിന്റെ പുറകിലെന്നും ആഫ്രിക്കന് വംശജരില് നിന്ന് വാങ്ങിയതാണെന്നും കേരളത്തില് നിന്നും നിരവധി യുവാക്കള് ഇത്തരം ന്യൂജന് മയക്കുമരുന്നുകള്ക്കായി ഗോവയില് എത്തിച്ചേരുന്നുണ്ടെന്നും പ്രതി വെളിപ്പെടുത്തിയിട്ടുണ്ട്. എറണാകുളം എക്സൈസ് സ്പെഷ്യല് സ്ക്വാഡ് സര്ക്കിള് ഇന്സ്പെക്ടര് ബി. സുരേഷ്, ഇന്സ്പെക്ടര് പി. ശ്രീരാജ്, പ്രിവന്റീവ് ഓഫീസര് കെ.ആര്. രാം പ്രസാദ്, സിഇഒമാരായ എം.എം. അരുണ് കുമാര്, വിപിന്ദാസ് ഹരിദാസ്, രതീഷ് ഡ്രൈവര് പ്രദീപ് കുമാര് എന്നിവരടങ്ങിയ സംഘമാണ് പ്രതിയെ പിടികൂടിയത്.
