തിരുവനന്തപുരം: എക്സൈസ് സര്ക്കിള് ഇന്സ്പെക്ടറുടെ മേശപ്പുറത്ത് 10,000 രൂപ നിറച്ച അജ്ഞാത കവര് കണ്ടെത്തിയതില് അന്വേഷണം നടത്തുന്നതിന് പകരം പരാതിക്കാര്ക്കെതിരെ നടപടി എടുത്തതായി ആരോപണം.
കഴിഞ്ഞ ദിവസം തിരുവനന്തപുരം സിവില് എക്സൈസ് ഓഫീസിലാണ് സംഭവം നടക്കുന്നത്. എക്സൈസ് ഉദ്യോഗസ്ഥനായ പ്രവീണ് പുറത്തുപോകുന്നതിനായി മറ്റൊരു ഉദ്യോഗസ്ഥനായ ബിനുരാജ് ഡ്യൂട്ടി ഏറ്റെടുക്കാനെത്തിയപ്പോള് മേശപ്പുറത്തു നിന്നും കവര് കണ്ടെത്തുകയായിരുന്നു. തുടര്ന്ന് ഡ്യൂട്ടി കൈമാറി പുറത്തുപോയ സിവില് എക്സൈസ് ഓഫിസര് പ്രവീണിനെ ബിനുരാജ് വിവരമറിയിച്ചു.
എന്നാല് പണത്തെക്കുറിച്ച് പ്രവീണിന് അറിവുണ്ടായിരുന്നില്ല. ഓഫീസില് ഒറ്റയ്ക്കായതിനാല്, എക്സൈസ് സര്ക്കിള് ഇന്സ്പെക്ടര് അനില് കുമാറിനെ ബിനുരാജ് ഫോണില് വിവരം അറിയിച്ചു. കോടതി ഡ്യൂട്ടിക്കു പോയ അദ്ദേഹത്തിനും പണം ആരുടേതാണെന്ന് അറിയില്ല.
അതേസമയം കൈക്കൂലി കേസില് കുടുക്കാന് ആരെങ്കിലും കൊണ്ടുവച്ചതാണോയെന്ന സംശയത്തില് ഇവര് പോലീസില് വിവരം അറിയിച്ചു. എക്സൈസ് ഡെപ്യൂട്ടി കമ്മിഷണര് സംഭവത്തെക്കുറിച്ച് അന്വേഷിച്ചു റിപ്പോര്ട്ട് സമര്പ്പിച്ചു. റിപ്പോര്ട്ട് വന്നപ്പോള് നടപടിയെടുത്തത് പണം കണ്ടെത്തിയ ബിനുരാജിനും മുന്പ് ഡ്യൂട്ടിയിലുണ്ടായിരുന്ന പ്രവീണിനുമെതിരെ. ജോലിയില് ജാഗ്രത കാണിച്ചില്ലെന്ന് ആരോപിച്ച് രണ്ടു പേരെയും എക്സൈസ് കമ്മിഷണര് തൃശൂരിലെ എക്സൈസ് അക്കാദമിയിലേക്ക് പരിശീലനത്തിന് അയയ്ക്കുകയും ചെയ്തു.
പണത്തിന്റെ ഉറവിടം കണ്ടെത്താന് അന്വേഷണം നടത്തുന്നതിനു പകരം ഉദ്യോഗസ്ഥരെ ബലിയാടാക്കുകയാണ് എക്സൈസ് കമ്മിഷണര് ചെയ്തതെന്നാണ് ആക്ഷേപം ഉയരുന്നത്. കൂടാതെ ഓഫീസില് പാറാവ് ഡ്യൂട്ടിക്ക് രണ്ടുപേരെങ്കിലും വേണമെന്ന നിബന്ധന നടപ്പിലാക്കാത്ത ഉന്നത ഉദ്യോഗസ്ഥര്ക്കതിരെ നടപടിയില്ലെന്നും ആക്ഷേപമുണ്ട്.
വലിയ മയക്കുമരുന്നു കേസുകള് പിടിച്ച ഉദ്യോഗസ്ഥനാണ് അനില്കുമാര്. അനില്കുമാറിനോട് വിരോധമുള്ള പ്രതികള് പണം മേശയില് കൊണ്ടുവച്ച് കുടുക്കാന് ശ്രമിച്ചതാകാനാണ് സാധ്യതയെന്നാണ് ഡപ്യൂട്ടി കമ്മിഷണറുടെ റിപ്പോര്ട്ട്. സംഭവത്തില് വിശദമായ റിപ്പോര്ട്ട് സമര്പ്പിക്കാന് ജോയിന് കമ്മിഷണറെ ചുമതലപ്പെടുത്തി.
