തിരുവനന്തപുരം: യൂണിവേഴ്സിറ്റി കോളേജിലെ മൂന്നാം വര്ഷം ബിരുദ വിദ്യാര്ഥി അഖിലിനെ കുത്തിക്കൊലപ്പെടുത്താന് ശ്രമിച്ച കേസിലെ പ്രതികളായ എസ്എഫ്ഐ നേതാക്കള് ശിവരഞ്ജിത്, നസീം എന്നിവരുടെ പിഎസ് സി ഉള്പ്പെടെ പരീക്ഷകളില് ക്രമക്കേട് നടന്നിട്ടുണ്ടെന്ന സംശയം ബലപ്പെടുന്നു. പിഎസ് സി പരീക്ഷയില് ഉന്നത റാങ്ക് നേടിയ ഇരുവരും എംഎ ഫിസോസഫി ഒന്നാം സെമസ്റ്റര് പരീക്ഷയില് തോറ്റു തുന്നംപാടിയവര്. ഇരുവരുടേയും മാര്ക്ക് ലിസ്റ്റിന്റെ വിവരങ്ങള് പുറത്തുവന്നു.
2018ലാണ് ശിവരഞ്ജിത്ത് ഒന്നാം സെമസ്റ്റര് പരീക്ഷ എഴുതിയത്. ഒന്നാം സെമസ്റ്ററിലെ നാലു പേപ്പറുകള്ക്കും പരാജയപ്പെട്ട ഇയാള് 2019ല് വീണ്ടും ഈ പരീക്ഷകളെഴുതി എന്നാല് ഇക്കുറി നില മെച്ചമാക്കിയെങ്കിലും പാസാവാനായില്ല.ആദ്യത്തെ തവണ ക്ലാസിക്കല് ഇന്ത്യന് ഫിലോസഫി പേപ്പറിന് കേവലം നാല് മാര്ക്ക് മാത്രമാണ് ഇയാള്ക്ക് നേടാനായത്. എന്നാല് രണ്ടാം തവണ ഈ പേപ്പറിന് പന്ത്രണ്ട് മാര്ക്ക് വാങ്ങിയാണ് പരാജയപ്പെട്ടത്. ഇതിനെ തുടര്ന്നാണ് ഉത്തരക്കടലാസ് മോഷ്ടിച്ചു പരീക്ഷ ജയിക്കാന് ശ്രമിച്ചത്. നസീമിന്റെ പരീക്ഷ ഫലവും ഏതാണ്ട് ശിവരഞ്ജിത്തിന് തുല്യമാണ്. എല്ലാ വിഷയങ്ങളിലും വിജയിക്കാനാവാത്തതിനാല് സെമസ്റ്റര് വിജയം നേടാനായില്ല. യൂണിവേഴ്സിറ്റി പരീക്ഷയില് രണ്ട് തവണ തോറ്റ ഈ എസ്എഫ്ഐ നേതാക്കള് പി.എസ്.സി പരീക്ഷയില് ഒന്നാം സ്ഥാനമുള്പ്പടെ കരസ്ഥമാക്കിയത് എങ്ങനെ എന്നതില് വിശദമായ അന്വേഷണം അനിവാര്യമായിരിക്കുകയാണ്.
പരീക്ഷ ഹാളിലെത്തി ശിവരഞ്ജിത്ത് എഴുതിയ ഉത്തരക്കടലാസില് പ്രണയലേഖനവും ഇംഗ്ലീഷില് എഴുതിയ മലയാളം സിനിമപ്പാട്ടുകളുമാണെന്നും കണ്ടെത്തിയിരുന്നു. പരീക്ഷാ ചുമതലയുള്ളവരുടെ തെറ്റിദ്ധരിപ്പിക്കാന് ഹാളില് വെച്ച് ഉത്തരക്കടലാസില് എന്തെങ്കിലും എഴുതി പിന്നീട് ശരി ഉത്തരം എഴുതിയ കടലാസ് ജീവനക്കാരുടെ സഹായത്തോടെ തിരുകിക്കയറ്റി മാര്ക്ക് നേടലാകും ലക്ഷ്യമെന്നാണ് പൊലീസ് കരുതുന്നത്. പരീക്ഷാഹാളില് ഇന്വിജിലേറ്റര് വരുമ്പോള് ഉത്തരക്കടലാസില് എന്തെങ്കിലും എഴുതുന്നുണ്ടെന്ന് വരുത്താനുള്ള ശ്രമമായിരുന്നു.
അതിനിടെ, ആറ്റുകാലിലെ ശിവരഞ്ജിത്തിന്റെ വീട്ടില് നടത്തിയ പരിശോധനയില് കണ്ടെടുത്തത് 16 കെട്ട് ഉത്തരക്കടലാസുകളാണ്. ഇത് യൂണിവേഴ്സിറ്റി കോളേജിന് സര്വ്വകലാശാല നല്കിയതാണെന്ന് നേരത്തെ പരീക്ഷാ കണ്ട്രോളര് വ്യക്തമാക്കിയിരുന്നു. കെട്ടുകളില് ഒന്ന് എസ്എഫ്ഐ നേതാവായിരുന്ന പ്രണവിന് നല്കിയതാണെന്ന വിവരവും കോളേജ് അധികൃതര് പൊലീസിന് കൈമാറി. ഇതോടെ എസ്എഫ്ഐ നേതാക്കള് കൂട്ടത്തോടെ ഉത്തരക്കടലാസ് കടത്തിയെന്ന് തെളിയുകയായിരുന്നു. പിഎസ് സി പോലീസ് കോണ്സ്റ്റഭില് പരീക്ഷയില് ശിവരഞ്ജിത്തിന് ഒന്നാം റാങ്കും പ്രണവിനു രണ്ടാം റാങ്കുമായിരുന്നു.
