തിരുവനന്തപുരം: യൂണിവേഴ്സിറ്റി കോളജിലെ വിദ്യാര്ത്ഥിയെ കുത്തിവീഴ്ത്തിയ എസ്എഫ്ഐ ഗുണ്ടയുടെ വീട്ടില് പോലീസ് പരിശോധന റിപ്പോര്ട്ട് ചെയ്യാനെത്തിയ മാധ്യമ പ്രവര്ത്തകരെ കമ്പിവടിക്ക് തല്ലി ഓടിച്ചിട്ടും ഒരക്ഷരം ഉരിയാടാതെ പത്രപ്രവര്ത്തകരുടെ സംഘടന. സിപിഎം ഗുണ്ടാ കുടുംബത്തിന്റെ കയ്യില് നിന്നും കമ്പിവടിക്ക് സഹപ്രവര്ത്തകര്ക്ക് തല്ലുകിട്ടിയിട്ടും ഒരു പ്രതിഷേധക്കുറിപ്പ് ഇറക്കാന് പോലും മാധ്യമപ്രവര്ത്തകരുടെ ഏക സംഘടനയായ കേരളാ യൂണിയന് ഓഫ് വര്ക്കിങ് ജേര്ണലിസ്റ്റ് (കെ.യു.ഡബ്ള്യു.ജെ) തയാറായിട്ടില്ല.
പൊലീസ് റെയ്ഡിന്റെ വിവരമറിഞ്ഞു ശിവരഞ്ജിത്തിന്റെ വീട്ടിലെത്തിയ മാധ്യമപ്രവര്ത്തകര് നേരിട്ടതു ഭീകരാന്തരീക്ഷമായിരുന്നു. ഇരുമ്പു കമ്പി വീശി അസഭ്യവര്ഷം നടത്തിയ ബന്ധുക്കള് പൊലീസിനെയും വെല്ലുവിളിച്ചിരുന്നു.
ഇന്നലെ വൈകിട്ട് ആറിനു കന്റോണ്മെന്റ് എസ്ഐയുടെ നേതൃത്വത്തില് പരിശോധന ആരംഭിച്ചതിനു പിന്നാലെയാണു സമീപത്തു താമസിക്കുന്ന ബന്ധുക്കള് ബഹളവുമായെത്തിയത്. പുറത്തു ദൃശ്യങ്ങള് പകര്ത്തുകയായിരുന്ന മാധ്യമപ്രവര്ത്തകരെ കമ്പിവടിക്ക് തല്ലിഓടിക്കുകയായിരുന്നു. മാധ്യമപ്രവര്ത്തകര് സഹായം തേടിയെങ്കിലും പൊലീസ് അക്രമം കണ്ടിട്ടും അനങ്ങിയില്ല. നേരത്തെ ശബരിമല വിഷയത്തില് മാധ്യമപ്രവര്ത്തകരെ ആക്രമിച്ചുവെന്ന് ആരോപിച്ച് പത്രപ്രവര്ത്തക യൂണിയന്റെ നേതൃത്വത്തില് സംസ്ഥാനത്ത് പലയിടത്തും പ്രതിഷേധം നടത്തിയിരുന്നു. ശശികല ടീച്ചറിന്റെയും ബിജെപി നേതാക്കളുടെയും പത്രസമ്മേളനങ്ങള് മാധ്യമപ്രവര്ത്തകര് ബഹികരിച്ചിരുന്നു. എന്നാല് സിപിഎം ഗുണ്ടാകുടുംബം മാധ്യമ പ്രവര്ത്തകരെ പരസ്യമായി കമ്പിവടിക്ക് തല്ലിഓടിച്ചിട്ടും ഒരു പ്രതിഷേധം പോലും പത്രപ്രവര്ത്തക യൂണിയന് നടത്തിയിട്ടില്ല. ഇതിനെതിരെ മാധ്യമപ്രവര്ത്തകരുടെ ഇടയില് തന്നെ പ്രതിഷേധം ഉയര്ന്നിട്ടുണ്ട്.
