തിരുവനന്തപുരം: യൂണിവേഴ്സിറ്റി കോളേജിലെ എസ്എഫ്ഐക്കാരുടെ കത്തിക്കുത്തിനെ തുടര്ന്ന് തെരുവില് ഇറങ്ങിയ വിദ്യാര്ത്ഥികളുടെ ആവശ്യങ്ങള് വിദ്യാഭ്യാസ വകുപ്പ് അംഗീകരിച്ചു. ആദ്യ പടിയായി കോളേജിലെ യൂണിയന് ഓഫീസ് ഒഴിപ്പിക്കും. കോളേജിലെ യൂണിയന് ഓഫീസ് ഒഴിപ്പിച്ച് ക്ലാസ് മുറികളായി മാറ്റാനാണ് തീരുമാനമെന്ന് വിദ്യാഭ്യാസ അഡീ.ഡയറക്ടര് സുമ വ്യക്തമാക്കി. പ്രിന്സിപ്പല് ഇന് ചാര്ജിന് വീഴ്ചയുണ്ടായത് പരിചയക്കുറവ് മൂലമാണെന്നും അഡീ.ഡയറക്ടര് സുമ പറഞ്ഞു.
അഖിലിനെ വധിക്കാന് ശ്രമിച്ച കേസിലെ മുഖ്യപ്രതികള് ഇന്നു പുലര്ച്ചെ പിടിയിലായിരുന്നു. ഒന്നാം പ്രതി ശിവരഞ്ജിത്തും രണ്ടാം പ്രതി നസീമുമാണ് പിടിയിലായത്. തിരുവനന്തപുരം കേശവദാസപുരത്ത് നിന്ന് കന്റോണ്മെന്റ് പോലീസാണ് ഇരുവരേയും അറസ്റ്റ് ചെയ്തത്. കല്ലറയിലേക്ക് പോകാന് ഓട്ടോയില് കേശവദാസപുരത്ത് എത്തിയപ്പോഴാണ് ഇരുവരേയും അറസ്റ്റ് ചെയ്തതെന്ന് കന്റോണ്മെന്റ് പോലീസ് അറിയിച്ചു.
ഇതോടെ പൊലീസ് ലുക്ക് ഔട്ട് നോട്ടീസ് ഇറക്കിയവരില് അഞ്ച് പ്രതികള് ഉള്പ്പെടെ ആറുപേര് പിടിയിലായി. ഇന്നലെ വൈകിട്ടോടെയാണ് കേസിലെ പ്രതികളായ ആരോമല്, ആദില്, അദ്വൈത്, ഇജാബ് എന്നിവരെ പൊലീസ് പിടികൂടിയത്. സാക്ഷിമൊഴികളുടെ അടിസ്ഥാനത്തില് അക്രമിസംഘത്തിലുണ്ടായിരുന്ന കോളേജ് എസ്എഫ്ഐ യൂണിറ്റ് കമ്മിറ്റി അംഗം ഇജാബിനെ നേരത്തെ പൊലീസ് അറസ്റ്റ് ചെയ്തിരുന്നു. അതേസമയം, പ്രതികള്ക്കായി ഇന്നലെ അര്ദ്ധരാത്രി പൊലീസ് യൂണിവേഴ്സിറ്റി കോളേജ് ഹോസ്റ്റലിലും സ്റ്റുഡന്റ്സ് സെന്ററിലും നടത്തിയ പരിശോധനയില് മാരകായുധങ്ങള് കണ്ടെടുത്തു. ഇരുമ്പുദണ്ഡുകള് ഉള്പ്പെടെയാണ് കണ്ടെത്തിയതെന്ന് ഡിസിപി ആദിത്യ പറഞ്ഞു.
ഇന്നലെ വൈകിട്ട് ശിവരഞ്ജിത്തിന്റേയും നസീമിന്റേയും വീട്ടില് പൊലീസ് പരിശോധന നടത്തിയിരുന്നു. ശിവരഞ്ജിത്തിന്റെ വീട്ടില് നടത്തിയ പരിശോധനയില് സീലുകള് പതിപ്പിക്കാത്ത യൂണിവേഴ്സിറ്റി പരീക്ഷ പേപ്പറുകളുടെ കെട്ടുകള് പൊലീസ് കണ്ടെത്തിയിട്ടുണ്ട്. എഴുതിയതും എഴുതാത്തുമായ 16 ബുക്ക്ലെറ്റുകളും ഫിസിക്കല് എഡ്യുക്കേഷന് ഡയറക്ടറുടെ സീലും വീട്ടില്നിന്ന് കണ്ടെടുത്തു.
