കൊച്ചി: മുഖ്യമന്ത്രിയെയും മറ്റു മന്ത്രിമാരെയും അവഹേളിച്ചു വാട്സാപ് പോസ്റ്റിട്ടതിന്റെ പേരില് തിരുവനന്തപുരം മെഡിക്കല് കോളജ് പൊലീസ് റജിസ്റ്റര് ചെയ്ത കേസില് തുടര്നടപടി ഹൈക്കോടതി തടഞ്ഞു. കേസ് രാഷ്ട്രീയപ്രേരിതമാണെന്ന് ആരോപിച്ച് പ്രതികളായ ദിപിന് കുര്യാക്കോസും മറ്റും നല്കിയ ഹര്ജിയിലാണു കോടതി നടപടി. തിരുവനന്തപുരം മെഡി. കോളജ് ആശുപത്രിയുമായി ബന്ധപ്പെട്ട വാട്സാപ് ഗ്രൂപ്പില് പോസ്റ്റിട്ടതാണ് കേസിന് ആധാരം. മെഡിക്കല് കോളജ് പ്രിന്സിപ്പല് നല്കിയ പരാതിയിലായിരുന്നു കേസ്.
അതേസമയം, സമൂഹമാധ്യമങ്ങള് വഴി മുഖ്യമന്ത്രിയെ വിമര്ശിച്ച 119 പേര്ക്കെതിരെ ഈ സര്ക്കാരിന്റെ കാലത്ത് കേസെടുത്തത്. ഈ കേസുകളുടെ എല്ലാം നടപടി ഹൈക്കോടതിയുടെ ഈ വിധിയോടെ അസാധുവായി പോകാന് സാധ്യതയുണ്ടെന്ന് നിയമവിദഗ്ദ്ധര് പറയുന്നു. മുഖ്യമന്ത്രിയെയും മന്ത്രിമാരെയും വിമര്ശിച്ച 41 സംസ്ഥാന സര്ക്കാര് ജീവനക്കാര്ക്കെതിരെ പിണറായി സര്ക്കാള്ര് ശിക്ഷാനടപടി സ്വീകരിച്ചിട്ടുണ്ട്. മുഖ്യമന്ത്രിയെ വിമര്ശിച്ച 12 പേര് സംസ്ഥാന സര്ക്കാര് ഉദ്യോഗസ്ഥരും ഒരാള് കേന്ദ്രസര്ക്കാര് ജീവനക്കാരനും ആണെന്ന് വ്യക്തമാക്കുന്നു. കഴിഞ്ഞ നിയമസഭാ സമ്മേളനത്തില് ഉന്നയിച്ച ചോദ്യങ്ങള്ക്ക് നല്കിയ ഉത്തരത്തിലാണ് ഇക്കാര്യങ്ങള് ഉള്ളത്.
ജനുവരി വരെയുള്ള കണക്കാണ് പുറത്തുവിട്ടത്. ഇതില് നടപടിക്ക് വിധേയരായ സര്ക്കാര് ഉദ്യോഗസ്ഥരില് 12 പേര്ക്കെതിരെ കേസ് റജിസ്റ്റര് ചെയ്തെന്നും 29 പേര്ക്കെതിരെ വകുപ്പുതല നടപടികള് സ്വീകരിച്ചെന്നും മുഖ്യമന്ത്രിയുടെ മറുപടി വ്യക്തമാക്കുന്നു. ശബരിമല സ്ത്രീ പ്രവേശന വിധിയുമായി ബന്ധപ്പെട്ടുണ്ടായ വിവാദ കാലത്ത് മുഖ്യമന്ത്രി പിണറായി വിജയനെതിരെ പോസ്റ്റുകള് പ്രസിദ്ധീകരിച്ചതിനു 38 കേസുകളാണ് രജിസ്റ്റര് ചെയ്തത്. ഇതില് ആകെ 56 പ്രതികളുണ്ട്. ഇവരില് 26 പേരെ ഇതിനോടകം അറസ്റ്റ് ചെയ്തിട്ടുണ്ട്.
