തിരുവനന്തപുരം: ശാന്തികവാടത്തിലും പരിസരപ്രദേശത്തും തെരുവുനായ ശല്യം രൂക്ഷം. സംസ്ക്കാര ചടങ്ങുകള്ക്കായി മൃതദേഹം കിടത്തുന്ന ഭാഗത്തുവരെ നായ ശല്യം രൂക്ഷമാണ്.
കണ്ണൊന്നു തെറ്റിയാല് മൃതദേഹത്തിലും നായ കടിക്കുന്ന അവസ്ഥയാണ്. അത്രയ്ക്ക് രൂക്ഷമാണ് ശാന്തികവാടത്തിലും പരിസരത്തും തെരുവുനായയുടെ ശല്യം. സംസ്ക്കാര ചടങ്ങ് തീരുന്നതുവരെ നായകളെ ആട്ടി ഓടിക്കേണ്ട അവസ്ഥയാണ് കൂടെ എത്തുന്നവര്. നിരവധിപേര് പരാതിപ്പെട്ടിട്ടും നഗരസഭയും ശാന്തികവാടത്തിന്റെ നടത്തിപ്പ് ചുമതലയുള്ള കരാറുകാരനും യാതൊരു നടപടിയും സ്വീകരിക്കുന്നില്ല.
നായകളുടെ കേന്ദ്രമായി മാറിയിരിക്കുകയാണ് ശാന്തികവാടം. തെരുവുകളില് വലിച്ചെറിയുന്ന ഭക്ഷണ അവശിഷ്ടങ്ങളും ഇറച്ചിമാലിന്യങ്ങളും ഭക്ഷിച്ച് ശാന്തികവാടത്തിലും പരിസരത്തും നായകള് പെറ്റുപെരുകുകയാണ്. ഇലക്ട്രിക് ക്രിമിറ്റോറിയത്തില് സംസ്ക്കരിക്കുന്നതിന് ചിലപ്പോള് താമസം നേരിടാറുണ്ട്.
ആദ്യം എത്തുന്ന മൃതദേഹം സംസ്ക്കരിക്കുന്ന മുറയ്ക്കാണ് അടുത്തതിന് സമയം നല്കാറ്. എന്നാല് നല്കിയിരിക്കുന്ന സമയത്തിനു മുമ്പ് മൃതദേഹവുമായി ചിലര് എത്താറുണ്ട്. ആംബുലന്സില് നിന്ന് സംസ്ക്കാര ചടങ്ങുകള്ക്കായി തയാറാക്കിയിട്ടുള്ള സ്ഥലത്ത് ഇറക്കി വയ്ക്കും. ക്രിമിറ്റോറിയത്തിന്റെ സമയക്രമത്തിന് അനുസരിച്ചാണ് സംസ്ക്കാര ചടങ്ങുകള് തുടങ്ങുക. ഇത്തരത്തില് മൃതശരീരം കിടത്തിയ ശേഷം മാറിനിന്നാല് നായ കടിച്ചതു തന്നെ.
സമീപത്തെ റോഡിലൂടെ പോകുന്നവരെയും നായകള് വെറുതെ വിടാറില്ല. കൂട്ടമായി വന്ന് ആക്രമിക്കാറുണ്ട്. ഒറ്റയ്ക്ക് പോകുന്ന സ്കൂള് കുട്ടികളെയും ഉപദ്രവിക്കുന്നു. നായകളെ ഭയന്ന് കുട്ടികള് ഓടുമ്പോള് പിന്തുടര്ന്ന് കടിക്കും. മുതിര്ന്നവരേയും വെറുതേവിടുന്നില്ല. നായകളെ പേടിച്ച് പലരും ഇതുവഴിയുള്ള യാത്ര ഒഴിവാക്കിയിരിക്കുകയാണ്.
ഇരുചക്രവാഹനയാത്രക്കാര്ക്കും ഇവിടത്തെ നായകള് വലിയ ഭീഷണിയായി മാറിയിരിക്കുന്നു. ഇതു വഴിയുള്ള യാത്രയ്ക്കിടെ ശാന്തികവാടത്തിനുള്ളില് നിന്ന് നായകള് കുറുകെ ചാടുന്നത് അപകടങ്ങള്ക്ക് ഇടയാക്കുന്നു. നഗരസഭയ്ക്ക് നായപിടിക്കാനുള്ള സംവിധാനങ്ങള് ഉണ്ടായിട്ടും അവയൊക്കെ വേണ്ടവിധം വിനിയോഗിക്കാത്തതാണ് ശാന്തികവാടത്തില് നായശല്യം വര്ധിക്കാനുള്ള കാരണം.
