തിരുവനന്തപുരം : തിരുവനന്തപുരം കോര്പ്പറേഷനിലെ സിപിഎം, സിപിഐ തമ്മിലുള്ള പോര് മുറുകുന്നു. സിപിഎം അനുകൂല യൂണിയനായ കേരള മുന്സിപ്പല് കോര്പ്പറേഷന് സ്റ്റാഫ് യൂണിയന് നേതാവ് സുരേഷിനെതിരായ പ്രതിഷേധത്തില് പ്രതിപക്ഷ കൗണ്സിലര്മാര്ക്കൊപ്പം ഭരണമുന്നണിയില് പെട്ട സിപിഐയുടേയും അംഗങ്ങള് പങ്കെടുത്തതോടെയാണ് പോര് മുറുകിയത്.
ഉടമസ്ഥാവകാശ സര്ട്ടിഫിക്കറ്റിന് റവന്യൂ ഇന്സ്പെക്ടര് കൂടിയായ സുരേഷ് കൈക്കൂലി ആവശ്യപ്പെട്ടു എന്നാരോപിച്ചായിരുന്നു പ്രതിഷേധം. കോണ്ഗ്രസ് എസ്സിന്റെ പ്രവര്ത്തകര്ക്കൊപ്പം സിപിഐ അംഗങ്ങളും പ്രതിഷേധവുമായി രംഗതെത്തിയതോടെയാണ് ഇടതു മുന്നണിയിലെ ഉള്പ്പോര് പരസ്യമായത്.
ഉടമസ്ഥാവകാശ സര്ട്ടിഫിക്കറ്റിന് അപേക്ഷിച്ചയാളോട് സുരേഷ് കൈക്കൂലി ആവശ്യപ്പെട്ടെന്നും ഒരുവര്ഷമായി അപേക്ഷ തീര്പ്പാക്കിയില്ലെന്നും കൗണ്സില് യോഗത്തില് സിപിഐ കൗണ്സിലര് സോളമന് വെട്ടുക്കാട്ട് ആരോപിച്ചിരുന്നു. കോണ്ഗ്രസ് എസ് ഇതിനെ അനുകൂലിക്കുകയും ചെയ്തു. തുടര്ന്ന് ഇവര്ക്കുമെതിരെ കോര്പ്പറേഷന് അങ്കണത്തില് സുരേഷിന്റെ നേതൃത്വത്തില് സിപിഎം അനുകൂല സ്റ്റാഫ് യൂണിയനില്പ്പെടുന്ന ജീവനക്കാര് പ്രകടനം നടത്തി.
അതേസമയം പ്രകടനത്തില് കൗണ്സിലര്മാരെ അഴിമതിക്കാരായി ചിത്രീകരിച്ചെന്നും വ്യക്തിഹത്യ നടത്തിയെന്നും ആരോപിച്ചാണ് കൗണ്സിലര്മാരും പ്രതിഷേധവുമായി രംഗതെത്തി. അതേസമയം, പ്രതിഷേധത്തില് നിന്നും സിപിഎം വിട്ടുനിന്നു.
