ന്യൂദല്ഹി: ശബരിമലയില് കനകദുര്ഗ്ഗമാരെ കയറ്റി ആചാരലംഘനം നടത്തിയ സിപിഎം ഗുരുവായൂരിലും ആചാരലംഘനത്തിനും അതു വഴി സംഘര്ഷം സൃഷ്ടിക്കുന്നതിനും ശ്രമിക്കുന്നു. ഇതിന്റെ ആദ്യ പടിയെന്നോണം ഗുരുവായൂരപ്പനെ കാണാന് ആഗ്രഹമുള്ള ക്രിസ്ത്യാനികളെ അതിന് അനുവദിക്കണമെന്ന നിലപാടുമായി ആരോഗ്യമന്ത്രി കെ.കെ. ശൈലജയാണ് രംഗത്തെത്തി.
വനിതയ്ക്ക് നല്കിയ അഭിമുഖത്തിലാണ് കെ.കെ ശൈലജ നിലപാട് വ്യക്തമാക്കിയിരിക്കുന്നത്. അയ്യപ്പനെ മാത്രമല്ല, ഗുരുവായൂരപ്പനെ കാണാന് ആഗ്രഹമുള്ള ക്രിസ്ത്യാനികളെയും അതിന് അനുവദിക്കണമെന്നാണ് നിലപാട്. യേശുദാസിന്റെ പാട്ട് കേള്ക്കാം, അദ്ദേഹത്തിന് ദേവനെ കാണാന് അനുവാദമില്ലെന്ന് പറയുന്നത് ശരിയല്ലല്ലോ…” ശൈലജ വ്യക്തമാക്കുന്നു.
ശബരിമല അവകാശം സ്ഥാപിക്കേണ്ട ഇടമല്ലെന്നും സംഘര്ഷം ഉണ്ടാക്കാനേ ഉപകരിക്കൂവെന്നുമൊക്കെ വ്യക്തമാക്കി മുന്നോട്ട് പോകുന്ന അഭിമുഖത്തില് ഈ കാര്യത്തില് സ്ത്രീകള് അശുദ്ധിയുള്ളവരാണെന്ന് പറഞ്ഞാല് അംഗീകരിക്കില്ലെന്നും ശൈലജ വ്യക്തമാക്കുന്നു.
സ്ത്രീകള്ക്ക് അയ്യപ്പനെ കാണാന് ആഗ്രഹമുണ്ടെങ്കില് അവരെ തടയരുത്. എന്നാല് അവകാശം സ്ഥാപിക്കാനായി ഇടിച്ചുതള്ളി മലയിലേക്ക് പോവുകയാണെന്ന നിലപാട് അംഗീകരിക്കാന് കഴിയില്ല. സംഘര്ഷം ഉണ്ടാക്കാനേ അത് ഉപകരിക്കൂ. ഭരണഘടനാപരമായി അവകാശം ഉണ്ടായിരിക്കാമെങ്കിലും അതിന്റെ പേരില് ചാടിപ്പുറപ്പെടണോ എന്നും ശൈലജ ചോദിക്കുന്നു.
അവകാശം സ്ഥാപിക്കേണ്ട ഇടമല്ല ശബരിമലയെന്നും അങ്ങനെ പോകേണ്ടവര്ക്ക് എത്ര ക്ഷേത്രങ്ങളുണ്ടെന്നും ശൈലജ ചോദിക്കുന്നിടത്ത് സിപിഎമ്മിന്റെ ഉദ്ദേശവും വ്യക്തമാണ്.
ശബരിമല വിഷയത്തില് വൈകിയുണ്ടായ ബോധോദയമല്ല ശൈലജയുടെ പ്രസ്താവനയില് വെളിപ്പെടുന്നത്. മറിച്ച് ശബരിമലയില് ഹിന്ദുത്വത്തെ മറികടന്ന് ചെയ്യാന് കഴിയാത്തത് മറ്റ് ക്ഷേത്രങ്ങളില് കഴിയുമോ എന്ന മനോഭാവമാണ് ഇതിലൂടെ നിഴലിക്കുന്നത്.
