കൊച്ചി : ബ്യൂട്ടി പാര്ലറിന്റെ മറവില് മയക്കുമരുന്ന് എത്തിച്ചുകൊണ്ടിരുന്നയാള് ആലുവയില് പിടിയില്. നിശാപാര്ട്ടികള്ക്ക് വേണ്ടി സംസ്ഥാനത്തിന്റെ വിവിധ ഭാഗങ്ങളില് ലഹരിമരുന്ന് എത്തിച്ച് കൊടുക്കുന്ന കോട്ടയം ഈരാറ്റുപേട്ട സ്വദേശിയായ കുരുവി അഷ്റു എന്ന് വിളിപ്പേരുള്ള സക്കീറാണ് (33) അറസ്റ്റിലായത്.
ആലുവ റേഞ്ച് എക്സൈസ് ഇന്സ്പെക്ടര് ടി. കെ. ഗോപിയുടെ നേതൃത്വത്തിലുള്ള ഷാഡോ സംഘമാണ് സക്കീറിനെ കസ്റ്റലിയിലെടുത്തത്. ഇയാളില് നിന്നും രണ്ട് കിലോ ഗ്രാം ഹാഷിഷ് ഓയില്, 95 എണ്ണം അല്പ്രാസോളം മയക്ക് മരുന്ന് ഗുളികകള്, 35 എണ്ണം നൈട്രോസെപാം മയക്ക് മരുന്ന് ഗുളികകള് എന്നിവ കണ്ടെടുത്തു. ഗ്രീന് ലേബല് വിഭാഗത്തില്പ്പെടുന്ന ഏറ്റവും മുന്തിയ ഇനം ഹാഷിഷ് ഓയിലാണ് ഇയാളില് നിന്ന് പിടിച്ചെടുത്തത് . അന്താരാഷ്ട വിപണിയില് ഇതിന് രണ്ട് കോടിയില്പരം രൂപ വിലമതിക്കും.
ഹിമാചല് പ്രദേശിലെ കുളു – മണാലി എന്നിവിടങ്ങളില് നിന്ന് ഏജന്റ്മാര് വഴിയാണ് ഇയാള് ഹാഷിഷ് ഓയില് കേരളത്തില് എത്തിക്കുന്നത്. ഗ്രീന് ലേബല് ഇനത്തില് പെടുന്ന ഹാഷിഷ് ഓയിലിന് ആവശ്യക്കാര് ഏറെയാണ്. മായം ചേര്ക്കാത്ത മയക്കുമരുന്നുകള് വില്ക്കുന്നത് കൊണ്ട് ഇയാളുടെ മയക്ക് മരുന്നിന് ഡാമാന്ഡ് കൂടുതലായിരുന്നു. മാനസ്സിക വിഭാന്തിയുള്ളവര്ക്ക് സമാശ്വാസത്തിനായി നല്കുന്നതാണ് നൈട്രോസെപാം ഗുളികകള്.
പെരുമ്പാവൂര്, വല്ലം കൊച്ചങ്ങാടിയില് ബ്യൂട്ടി പാര്ലര് നടത്തുന്ന ഇയാള് ആലുവ കുട്ടമശ്ശേരിയില് വാടയ്ക്ക് താമസിക്കുകയാണ്. ബ്യൂട്ടി പാര്ലറിന്റെ മറവില് വര്ഷങ്ങളായി കഞ്ചാവ് വില്പ്പന നടത്തി വരുകയാണ്. ഒരു സുഹൃത്ത് വഴി ബാംഗ്ലൂര് വച്ച് പരിചയപ്പെട്ട ഒരു ഇറാനിയന് സ്വദേശി വഴിയാണ് കുളു – മണാലി എന്നിവിടങ്ങളില് നിന്ന് ഹാഷിഷ് ഓയില് വാങ്ങാന് തുടങ്ങിയത്. ടെലിഗ്രാം മെസഞ്ചര് വഴിയാണ് ഇയാള് വിവരങ്ങള് കൈമാറിയിരുന്നത്. നിര്ദ്ദേശമനുസരിച്ച് ഇയാള് തൃശുര് – പാലക്കാട് എന്നിവിടങ്ങളില് വച്ചാണ് ഹാഷിഷ് ഓയില് വാങ്ങിയിരുന്നത്.
ഇയാളുടെ സഹായികള് നേരത്ത പിടിയിലായിട്ടുണ്ട്. തൃശൂരില് നിന്ന് സക്കീര് മയക്കു മരുന്നുകളുമായി വരുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തില് കുട്ടമശ്ശേരിക്കടുത്ത് വച്ച് ഇയാളുടെ കാര് എക്സൈസ് ഷാഡോ സംഘം തടയുകയായിരുന്നു. പിടിയിലാകുമെന്ന് ഉറപ്പായതോടെ കാര് ഉപേക്ഷിച്ച് ഇറങ്ങി ഓടിയ ഇയാളെ ഷാഡോ ടീം ഓടിച്ചിട്ട് പിടികൂടുകയായിരുന്നു. ആലുവ മജിസ്ട്രേറ്റ് കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
