ന്യൂദല്ഹി: ജമ്മുകശ്മീരിലെ അനന്തനാഗില് ഏറ്റുമുട്ടലില് അഞ്ചു ജവാന്മാരെ കൊലപ്പെടുത്തിയത് കാണ്ഡാഹാര് വിമാന റാഞ്ചല് സമയത്ത് ഇന്ത്യ വിട്ടയച്ച അല് ഉമര് മുജാഹുദ്ദീന് ഭീകരന് മുഷ്താഖ് അഹമ്മദ് സര്ഗാളെന്ന് രഹസ്യാന്വേഷണ വിഭാഗം. പാകിസ്താന് കേന്ദ്രീകരിച്ച് പ്രവര്ത്തിക്കുന്ന അല് ഉമര് മുജാഹുദ്ദീന് ആക്രമണത്തിന്റെ ഉത്തരവാദിത്വം ഏറ്റെടുത്തിരുന്നു.
1999-ല് കാണ്ഡഹാറില് വിമാനം റാഞ്ചിയ വേളയില് യാത്രക്കാരെ മോചിപ്പിക്കുന്നതിന് പകരമായി ഇന്ത്യ വിട്ടയച്ച ജെയ്ഷെ മുഹമ്മദ് തലവന് മസൂദ് അസറടക്കമുള്ള മൂന്ന് ഭീകരരില് മുഷ്താഖ് സര്ഗറും ഉണ്ടായിരുന്നു.
ബുധനാഴ്ചയാണ് കശ്മീരിലെ അനന്ത്നാഗില് ഒരു റോഡ് ഉദ്ഘാടന ചടങ്ങിനിടെ സിആര്പിഎഫ് ജവാന്മാര്ക്ക് നേരെ ആക്രമണമുണ്ടായത്. അല് ഉമര് മുജാഹിദീന് ആക്രമണത്തിന്റെ ഉത്തരവാദിത്തം ഏറ്റെടുത്തിരുന്നു. ആക്രമണത്തില് അഞ്ച് ജവാന്മാര് വീരമൃത്യു വരിക്കകുയും അഞ്ച് പേര്ക്ക് പരിക്കേല്ക്കുകയും ചെയ്തിരുന്നു.
അതേ സമയം അല് ഉമര് മുജാഹിദീന് സ്വന്തമായി ഇത്തരം ആക്രമണങ്ങള് നടത്താന് സ്വന്തം നിലയ്ക്ക് സാധിക്കില്ലെന്നും ജെയ്ഷെ മുഹമ്മദിന്റെ പിന്തുണയോടെയാണ് അനന്ത്നാഗില് ആക്രമണം നടത്തിയതെന്നും രഹസ്യാന്വേഷണ ഏജന്സികള് പറയുന്നു.
