1. തൊടുപുഴ താലൂക്ക് ഓഫീസിലെ ആളൊഴിഞ്ഞ ക്യാബിനുകള് 2.ടൗണ് ഹാളില് നടന്ന യാത്രയയപ്പ് ചടങ്ങില് ജീവനക്കാര് പങ്കെടുക്കുന്നു
തൊടുപുഴ: ഇന്നലെ രാവിലെ വിവിധ ആവശ്യങ്ങള്ക്ക് തൊടുപുഴ താലൂക്ക് ഓഫീസില് എത്തിയവര് കണ്ടത് ജീവനക്കാരില്ലാത്ത കാലിയായ ഓഫീസ്.
എന്താണ് സംഭവമെന്ന് തിരക്കിയപ്പോഴാണ് ജോലിയില് നിന്നും വിരമിച്ച നേതാവിന്റെ യാത്രയയപ്പിന് ജീവനക്കാര് കൂട്ടമായി പോയതാണെന്ന് മനസിലായത്. ഡ്യൂട്ടി സമയങ്ങളില് ഓണക്കാലത്ത് പൂക്കളം പോലും ഇടരുത് എന്ന മുഖ്യമന്ത്രിയുടെ തിട്ടൂരം നിലനില്ക്കുമ്പോഴാണ് യൂണിയന് നേതാവിന്റെ യാത്രയയപ്പ് സമ്മേളനത്തില് പങ്കെടുക്കുവാന് ജീവനക്കാര് കൂട്ടമായി ഓഫീസ് വിട്ടിറങ്ങിയത്. രാവിലെ 11 മണിയായപ്പോഴേക്കും ഓഫീസില് ഉണ്ടായിരുന്ന ജീവനക്കാര് അതിവേഗം കസേര കാലിയാക്കി സമ്മേളന സ്ഥലമായ മുന്സിപ്പല് ടൗണ്ഹാളിലേക്ക് പായുകയായിരുന്നു.
ജോയിന്റ് കൗണ്സില് സംസ്ഥാന ട്രഷററായ എ. സുരേഷ് കുമാറിന്റെ യാത്രയയപ്പ് സമ്മേളനമാണ് ഇന്നലെ രാവിലെ 11ന് ടൗണ് ഹാളില് നടന്നത്. സിപിഐ നേതാവ് പന്ന്യന് രവീന്ദ്രനാണ് പരിപാടി ഉദ്ഘാടനം ചെയ്തത്. തൊടുപുഴയുടെ സമീപത്തുള്ള വില്ലേജ് ഓഫീസുകളില് നിന്നും ജീവനക്കാര് ഓഫീസ് അനാഥമാക്കി പരിപാടിക്ക് എത്തിയിരുന്നു. രാവിലെ ഓഫീസ് വിട്ടിറങ്ങിയവര് ഉച്ചയോടെയാണ് തിരിച്ചെത്തിയത്. അതുവരെ ഓഫീസിന്റെ പ്രവര്ത്തനം സ്തംഭിച്ചു. യൂണിയന് നേതാവിന് യാത്രയയപ്പ് കൊടുക്കുവാന് അവധി ദിവസം തെരഞ്ഞെടുക്കാതെ പ്രവര്ത്തി ദിവസം തെരഞ്ഞെടുത്ത് പൊതുജനങ്ങളെ വെല്ലുവിളിക്കുകയാണ് സര്ക്കാര് ജീവനക്കാരുടെ സംഘടന.
ഇതിന് ഭരണപക്ഷം ഒത്താശ ചെയ്ത് കൊടുക്കുന്നു. ഇന്നലെ രാവിലെ താലൂക്ക് ഓഫീസില് എത്തിയവര് വന്നകാര്യം സാധിക്കാതെ നിരാശരായി മടങ്ങുകയാണ് ഉണ്ടായത്. കനത്ത മഴയുടെ മുന്നറിയിപ്പുള്ള സമയത്താണ് ജാഗ്രതയോടെ പ്രവര്ത്തിക്കേണ്ട ജീവനക്കാര് സ്വന്തം യൂണിയന് നേതാവിനെ യാത്രയാക്കുവാന് ജോലി സമയത്ത് ഓഫീസ് വിട്ടിറങ്ങിയത്.
