ലക്നൗ: ഗതാഗത നിയമങ്ങള് ലംഘിക്കുന്നവര്ക്കുള്ള പിഴ ശിക്ഷ ഇരട്ടിയാക്കി യോഗി ആദിത്യനാഥ് സര്ക്കാര്. മുഖ്യമന്ത്രി യോഗി ആദിത്യനാഥിന്റെ യോഗത്തില് ചേര്ന്ന കാബിനറ്റ് യോഗത്തിന് ശേഷമാണ് ട്രാഫിക് നിയമങ്ങള് കര്ശനമാക്കാനുള്ള തീരുമാനമെടുത്തത്.
1988ലെ മോട്ടോര് വാഹന നിയമത്തില് ഭേദഗതി വരുത്തിയാണ് പുതിയ തീരുമാനങ്ങള് നടപ്പാക്കിയിരിക്കുന്നത്. ട്രാഫിക് നിയമങ്ങള് ലംഘിക്കുന്നവര്ക്കുള്ള പിഴ ശിക്ഷ ഉയര്ത്തിയതിന് പുറമെ കാറുകള്ക്കും ഇരുചക്രവാഹനങ്ങള്ക്കും ഫാന്സി നമ്പര് പ്ലേറ്റുകള് ലഭിക്കാനുള്ള തുകയും ഉയര്ത്തിയിട്ടുണ്ട്. മന്ത്രി സിദ്ധാര്ത്ഥ് സിംഗാണ് ഇക്കാര്യങ്ങള് വ്യക്തമാക്കിയത്.
നമ്പര് പ്ലേറ്റ് ഇല്ലാതെ വാഹനം ഓടിക്കുന്നവര്ക്കുള്ള പിഴ 300ല് നിന്നും 500 ആയി ഉയര്ത്തി. ലൈസന്സ് ഇല്ലാതെ വാഹനം ഓടിച്ചാല് 1000 രൂപയാണ് പിഴ. നേരത്തെ ഇത് 500 രൂപയായിരുന്നു. മൊബൈല് ഫോണ് ഉപയോഗിച്ച് കൊണ്ട് വാഹനം ഓടിച്ചാലും, ഹെല്മെറ്റ് ഇല്ലാതെ ഇരു ചക്ര വാഹനങ്ങള് ഓടിച്ചാലും പിഴ ഇനി 1000 രൂപയാണ്. നേരത്തെ ഇതു രണ്ടിനും 500 രൂപയായിരുന്നു പിഴ ശിക്ഷ ഈടാക്കിയിരുന്നത്. കാറുകള്ക്ക് വിവിഐപി നമ്പര് പ്ലേറ്റുകള് ലഭിക്കണമെങ്കില് ഒരു ലക്ഷം, 50000, 25000, 15000 എ്ന്നിങ്ങനെയാണ് തുക വര്ദ്ധിപ്പിച്ചത്. ഇരു ചക്ര വാഹനങ്ങള്ക്ക് 3000 മുതല് 20000 വരെയായിരിക്കും തുക നല്കേണ്ടത്.
