ശബരിമല യുവതിപ്രവേശനത്തിലെ ഭരണഘടന ബെഞ്ചിന്റെ ഭൂരിപക്ഷ വിധി തള്ളി ജസ്റ്റിസ് ഇന്ദു മല്ഹോത്രയുടെ ന്യൂനപക്ഷ ഉത്തരവ് ഉദാഹരിച്ച് മദ്രാസ് ഹൈക്കോടതിയുടെ സുപ്രധാന ഉത്തരവ്. മഴ പെയ്യാന് യജ്ഞം നടത്തുന്നതു തടയണമെന്ന ഹര്ജിയാണ് ഇന്ദു മല്ഹോത്രയുടെ വിധിയെ ഉദാഹരിച്ച് കോടതി തള്ളിയത്. വിശ്വാസകാര്യങ്ങളില് കോടതി തീര്പ്പ് കല്പ്പിക്കുന്നത് ശരിയല്ലെന്ന ജസ്റ്റിസ് ഇന്ദു മല്ഹോത്രയുടെ വിധിയാണു മദ്രാസ് ഹൈക്കോടതി പരിഗണിച്ചതെന്ന് ‘ലൈവ്ലോ’ പറയുന്നു. സുപ്രീം കോടതി ചീഫ് ജസ്റ്റിസ് ദീപക് മിശ്ര അധ്യക്ഷനായ ഭരണഘടന ബെഞ്ചിന്റെ ഉത്തരവ് കീഴ്കോടതി തള്ളിയെന്നതും ഈ വിധിയുടെ സവിശേഷതയാണ്.
തമിഴ്നാട്ടിലെ കൊടുംവരള്ച്ചയെ പ്രതിരോധിക്കാനായി നല്ല മഴകിട്ടാന് യജ്ഞം നടത്തണമെന്ന് ക്ഷേത്രങ്ങളുടെ ചുമതലയുള്ള ഭരണവകുപ്പ് സര്ക്കുലര് പുറത്തിറക്കിയിരുന്നു. തമിഴ്നാട് ഹിന്ദു റിലീജിയസ് എന്ഡോവ്മെന്റ് ആക്ടിന്റെ പരിധിയില്വരുന്ന ക്ഷേത്രങ്ങളില് യജ്ഞം നടത്തണമെന്നായിരുന്നു ഉത്തരവ്. എന്നാല്, സര്ക്കാരിന്റെ ഈ നടപടി ചോദ്യം ചെയ്ത് മക്കള് സെയ്തി മയ്യം എഡിറ്റര് ഇ. അന്പഴകനും മറ്റും നല്കിയ ഹര്ജി തള്ളിക്കൊണ്ടാണ് കോടതി സുപ്രധാന ഉത്തരവ് പുറപ്പെടുവിച്ചത്.
മതപരമായോ ശാസ്ത്രീയമായോ ഇക്കാര്യം ശരിയാണെന്നു കണ്ടുപിടിക്കേണ്ട ജോലി കോടതിക്കില്ലെന്നും വിശ്വാസവുമായി ബന്ധപ്പെട്ട വിഷയങ്ങളില് യുക്തിക്കു സ്ഥാനമില്ലെന്നുമുള്ള ഇന്ദു മല്ഹോത്രയുടെ ശബരിമല വിധി ഉത്തരവില് ഹൈക്കോടതി പരാമര്ശിച്ചു. മഴ പെയ്യാന് യജ്ഞം നടത്തുന്നതു സമൂഹത്തിനു ദോഷകരമാകുമെന്നു കരുതാനാകില്ല. മതവിശ്വാസങ്ങളെ വേര്തിരിച്ചു കാണേണ്ടതുണ്ട്. മതവികാരങ്ങള് ഉള്പ്പെട്ട വിഷയങ്ങളില് കോടതി ഇടപെടാതിരിക്കുന്നതാവും അഭികാമ്യം. ആഴത്തില് വേരൂന്നിയ മതവിശ്വാസങ്ങളെ രാജ്യത്തിന്റെ മതനിരപേക്ഷതയ്ക്കായി മാറ്റിയെഴുതരുതെന്നും മദ്രാസ് ഹൈക്കോടതി വ്യക്തമാക്കിയെന്ന് ലൈവ് ലോ പറയുന്നു.
തമിഴ്നാട് സര്ക്കാരിന്റെ ഉത്തരവ് ഭരണഘടനയുടെ മതേതര സ്വഭാവത്തിന് എതിരാണെന്ന ഹര്ജിക്കാരുടെ വാദം ജസ്റ്റിസ് ഇന്ദു മല്ഹോത്രയുടെ വിധി ഉദ്ധരിച്ച് ഹൈക്കോടതി തള്ളിയത്. പുരാതനകാലം മുതല് ഇത്തരം യജ്ഞങ്ങള് നടത്താറുണ്ടെന്നും ഇത് മതമൈത്രിക്ക് എതിരല്ലെന്നുമുള്ള തമിഴ്നാട് സര്ക്കാരിന്റെ വാദം കോടതി അംഗീകരിക്കുകയായിരുന്നു. ജസ്റ്റിസ് സി.വി കാര്ത്തികേയന്, ജസ്റ്റിസ് കൃഷ്ണന് രാമസാമി എന്നിവര് അടങ്ങിയ ബെഞ്ചാണ് വിധി പുറപ്പെടുവിച്ചത്.
