കൊച്ചി: കേന്ദ്ര സമുദ്രമത്സ്യ ഗവേഷണ സ്ഥാപനത്തിന്റെ (സിഎംഎഫ്ആര്ഐ) മേല്നോട്ടത്തില് നടന്ന കല്ലുമ്മായ കൃഷിയില് നൂറുമേനി വിളവെടുപ്പ്. പ്രളയത്തില് കനത്ത നഷ്ടം നേരിട്ടതിന് ശേഷം നടന്ന ആദ്യ വിളവെടുപ്പാണിത്. ജില്ലയിലെ മൂത്തകുന്നത്ത് അഞ്ച് കര്ഷക സംഘങ്ങളാണ് കല്ലുമ്മക്കായ കൃഷിയിലൂടെ നേട്ടം കൊയ്തത്. ഇവരില് ഭൂരിഭാഗവും സ്ത്രീകളാണ്.
കഴിഞ്ഞ ജനുവരിയില് തുടങ്ങിയ കൃഷി അഞ്ച് മാസത്തിന് ശേഷമാണ് വിളവെടുപ്പ് നടത്തിയത്. അഞ്ച് മീറ്റര് നീളവും വീതിയുമുള്ള മുള കൊണ്ട് നിര്മിച്ച അഞ്ച് കൃഷിയിടങ്ങിലാണ് കല്ലുമ്മക്കായ കൃഷിയിറക്കിയത്. മൊത്തം 6.5 ടണ് കല്ലുമ്മക്കായയാണ് വിളവെടുപ്പിലൂടെ ലഭിച്ചത്. കഴിഞ്ഞ വര്ഷത്തെ പ്രളയത്തില് ഇവരുടെ കടല്മുരിങ്ങ കൃഷി പൂര്ണമായും നശിച്ചിരുന്നു. പ്രളയാനന്തരം കായല് ജൈവഘടനയില് വന്ന മാറ്റം കല്ലുമ്മക്കായ കൃഷിയെ ബാധിക്കുമോ എന്ന ആശങ്കയുണ്ടായിരുന്നു.
എന്നാല്, മികച്ച വിളവെടുപ്പ് ലഭിച്ചതിലൂടെ പ്രളയത്തിലെ നഷ്ടം ചെറിയ തോതിലെങ്കിലും നികത്താനാകുമെന്ന പ്രതീക്ഷയിലാണ് കര്ഷക സംഘങ്ങള്. സിഎംഎഫ്ആര്ഐയുടെ സാങ്കേതികവിദ്യ ഉപയോഗിച്ചാണ് കര്ഷക സംഘങ്ങള് കൃഷിയിറക്കിയത്. സിഎംഎഫ്ആര്ഐയിലെ മൊളസ്കന് ഫിഷറീസ് ഡിവിഷനാണ് കൃഷിക്ക് ആവശ്യമായ നിര്ദേശങ്ങള് നല്കിയത്. വിളവെടുപ്പിന് ശേഷം സിഎംഎഫ്ആര്ഐ തന്നെ വികസിപ്പിച്ച ശാസത്രീയ ശുദ്ധീകരണ പ്രക്രിയക്ക് ശേഷമാണ് കല്ലുമ്മക്കായ വില്പന നടത്തുന്നത്.
പോഷക സമ്പുഷ്ടം
ഏറെ ഔഷധമൂല്യമുള്ളതും കുട്ടികളുടെ ബുദ്ധിവളര്ച്ചയ്ക്ക് ഏറ്റവും ആവശ്യമായ ഒമേഗ-ത്രീ ഫാറ്റി ആസിഡിനാല് സമ്പുഷ്ടവുമാണ് കല്ലുമ്മക്കായ. അത്യപൂര്വമായ ധാതുലവണമായ സെലീനിയം, സിങ്ക്, കാത്സ്യം, അയേണ്, ഫോസ്ഫറസ്, സോഡിയം, പൊട്ടാസ്യം, മഗ്നീഷ്യം, കോപ്പര്, തുടങ്ങിയവയും ഇവയില് അടങ്ങിയിട്ടുണ്ട്. ശുദ്ധീകരിച്ച ശേഷം തോട് കളഞ്ഞ കല്ലുമ്മക്കായ പൊതുജനങ്ങള്ക്ക് വാങ്ങുന്നതിനായി സിഎംഎഫ്ആര്ഐയില് ലഭ്യമാണ്. സിഎംഎഫ്ആര്ഐയുടെ കാര്ഷിക സാങ്കേതികവിദ്യാ വിവരണ കേന്ദ്രത്തില് (ആറ്റിക്) നിന്ന് പ്രവൃത്തി ദിവസങ്ങളില് രാവിലെ 10 മുതല് വൈകുന്നേരം നാലുവരെ വാങ്ങാന് സാധിക്കും. 250ഗ്രാം പായ്ക്കറ്റിന് 175 രൂപയാണ് വില. വിവരങ്ങള്: 0484 2394867.
