പെരുമ്പാവൂര്: പ്ലൈവുഡ്കമ്പനി ഉടമയെ കൊലപ്പെടുത്തിയ കേസില് തൊഴിലാളിയെ കോടതി വെറുതെവിട്ടു. ആലുവ മാറമ്പിള്ളി വടക്കേ ഏഴിപ്രം കൊട്ടിക്കാതോട്ടത്തില് റഷീദ് (39) നെയാണ് മൂവാറ്റുപുഴ അസി. സെക്ഷന് ജഡ്ജി വെറുതെ വിട്ടത്. ഭാര്യയുമായി അവിഹതബന്ധമുണ്ടെന്നാരോപിച്ച് പെരുമ്പാവൂരിലെ പ്ലൈവുഡ്കമ്പനി ഉടമയായിരുന്ന ഇരിങ്ങോള് കാനാപുറം മരയ്ക്കാറിന്റെ മകന് നൗഷാദ് (42)നെ കൊലപ്പെടുത്തിയ കേസിലാണ് പ്രതിയെ വിട്ടയച്ചത്.
കുറ്റം സംശയാദിതമായി തെളിയിക്കുന്നതിനാവശ്യമായ ശാസ്ത്രീയ തെളിവുകളോ സാക്ഷിമൊഴികളോ ഇല്ലെന്ന് വിധി ന്യായത്തില് വ്യക്തമാക്കുന്നു. കൊല്ലപ്പെട്ട നൗഷാദിന്റെ പ്ലൈവുഡ് കമ്പനിയിലെ ജീവനക്കാരനായിരുന്നു പ്രതിസ്ഥാനത്തുണ്ടായിരുന്ന റഷീദ്. ഭാര്യയുടെ ഫോണിലേക്ക് കമ്പനിയുടമ നിരന്തരംവിളിക്കുന്നത് കണ്ടെത്തിയ പ്രതി ഇയാളെ കൊലപ്പെടുത്തുകയായിരുന്നുവെന്നാണ് പ്രൊസിക്യൂഷന് കേസ്.
2015 മെയ് ഏഴിനാണ് കേസിനാസ്പദമായ സംഭവം. ബുള്ളറ്റില് വരികയായിരുന്ന നൗഷാദിനെ പ്രതി സഞ്ചരിച്ചിരുന്ന കാര് ഉപയോഗിച്ച് ഇടിച്ചുവീഴ്ത്തി കുത്തികൊലപ്പെടുത്തുകയായിരുന്നുവെന്നാണ് കുറുപ്പംപടി പോലീസ് ചാര്ജ്ജ് ചെയ്ത കേസ്. ദൃക്സാക്ഷിയടക്കം നിരവധിപേര് സാക്ഷിപട്ടികയിലുണ്ടെങ്കിലും കേസ് തെളിയിക്കുന്നതിന് പ്രൊസിക്യൂഷന് കഴിഞ്ഞില്ല. പ്രതിഭാഗത്തിനുവേണ്ടി ഹൈക്കോടതി അഭിഭാഷകരായ രാജേന്ദ്രേന് മഞ്ചേരി, അനില്. കെ. മുഹമ്മദ് എന്നിവര് ഹാജരായി. ജോ പോള് ആയിരുന്നു സെപ്ഷ്യല് പ്രൊസിക്യൂട്ടര്.
