ഭരണപരിഷ്‌കാര കമ്മീഷന്‍ ധൂര്‍ത്ത് തുടരുന്നു: ഒക്‌ടോബര്‍ വരെ ചെലവ് ആറുകോടി; സമര്‍പ്പിച്ചത് മൂന്നു റിപ്പോര്‍ട്ടുകള്‍

പത്തനംതിട്ട: ഭരണപരിഷ്‌കാര കമ്മീഷന്‍ ധൂര്‍ത്ത് തുടരുമ്പോഴും സമര്‍പ്പിച്ച റിപ്പോര്‍ട്ടുകള്‍ സര്‍ക്കാര്‍ അവഗണിക്കുന്നതായി ആക്ഷേപം. കഴിഞ്ഞ ഒക്‌ടോബര്‍ വരെ കമ്മീഷന്റെ ചിലവ് ആറുകോടി രൂപ. ഇതിനോടകം മൂന്ന് റിപ്പോര്‍ട്ടുകള്‍ മാത്രമാണ് കമ്മീഷന്‍ സര്‍ക്കാരിന് സമര്‍പ്പിച്ചത്. എന്നാല്‍ ഇവയില്‍ ഒരു നടപടിയും സര്‍ക്കാരിന്റെ ഭാഗത്തുനിന്നും ഉണ്ടായിട്ടുമില്ല. ഇടതുമുന്നണി സര്‍ക്കാര്‍ അധികാരത്തില്‍ വന്നതോടെയാണ് മുന്‍ മുഖ്യമന്ത്രി വി.എസ്. അച്യുതാനന്ദന്‍ ചെയര്‍മാനായി ഭരണപരിഷ്‌കാര കമ്മീഷന്‍ നിലവില്‍ വന്നത്. 

2016 ഒക്ടോബര്‍ മുതല്‍  2018 ഒക്ടോബര്‍ 31 വരെ കമ്മീഷനുവേണ്ടി ആറു കോടിയോളം രൂപ ചെലവഴിച്ചതായി വിവരാവകാശ രേഖകള്‍ വെളിവാക്കുന്നു. കേരള കോണ്‍ഗ്രസ് (എം) സംസ്‌കാര വേദി ചെയര്‍മാന്‍ ഡോ. വര്‍ഗീസ് പേരയില്‍  ഉന്നയിച്ച ചോദ്യങ്ങള്‍ക്കുള്ള മറുപടിയിലാണ് കണക്കുകള്‍ വ്യക്തമാക്കുന്നത്. ഒക്ടോബര്‍ വരെയുള്ള കാലയളവില്‍ ശമ്പളം, യാത്രാപ്പടി, അനുബന്ധ ചെലവുകള്‍ എന്നിവയ്‌ക്കാണ് തുക വിനിയോഗിച്ചിട്ടുള്ളത്. ചെയര്‍മാന്‍, അംഗങ്ങള്‍, ഇതര ഉദ്യോഗസ്ഥര്‍ എന്നിവര്‍ യോഗങ്ങള്‍ നടത്തിയതിന്റെ  ചെലവ് ഇതിന് പുറമെയാണ്. 

2018 ഒക്ടോബറിന് ശേഷമുള്ള തുക കൂടി കണക്കിലെടുത്താല്‍ ചെലവ് ഇനിയും ഉയരും. 2018 ഒക്ടോബര്‍ 31 വരെ 17 സിറ്റിങ്ങുകള്‍ കമ്മീഷന്‍ നടത്തിയിട്ടുണ്ട്. ഇതില്‍ മൂന്ന് റിപ്പോര്‍ട്ടുകള്‍ മാത്രമാണ് സര്‍ക്കാരിന് സമര്‍പ്പിച്ചിട്ടുള്ളത്. ഇവയില്‍ ഒരു നടപടിയും സര്‍ക്കാര്‍ ഭാഗത്തുനിന്നുണ്ടായിട്ടില്ല. അന്തര്‍ സംസ്ഥാന യാത്രകള്‍, വിദഗ്ധരുമായി കൂടിയാലോചനകള്‍ ഇവ നടത്തിയാണ് കമ്മീഷന്‍ റിപ്പോര്‍ട്ടുകള്‍ തയാറാക്കിയത്. ഡെപ്യൂട്ടേഷന്‍ വ്യവസ്ഥയില്‍ 11 ഉദ്യോഗസ്ഥരെ നിയമിച്ചായിരുന്നു കമ്മീഷന്‍ പ്രവര്‍ത്തനം തുടങ്ങിയത്. 

അഡീഷണല്‍ സെക്രട്ടറി, ഡെപ്യൂട്ടി കളക്ടര്‍, ഫിനാന്‍സ് ഓഫീസ്, അണ്ടര്‍ സെക്രട്ടറി, സെക്ഷന്‍ ഓഫീസര്‍ തുടങ്ങി 30 തസ്തികകള്‍ പുതുതായി സൃഷ്ടിച്ചിട്ടുണ്ട്. അവരുടെ ആനുകൂല്യങ്ങള്‍കൂടി നല്‍കുമ്പോള്‍ വീണ്ടും ചെലവേറും. ചെയര്‍മാനായ വി.എസ്. അച്യുതാനന്ദന് 17,01,114 രൂപയാണ് വേതനമടക്കം ചെലവ്. മെമ്പര്‍ സി.പി. നായര്‍ക്ക് 20,26,371 രൂപയും പാര്‍ട്ട്ടൈം മെംബര്‍ നീല ഗംഗാധരന്‍ 7,45,000 രൂപയും കമ്മീഷനില്‍ നിന്നു നല്‍കേണ്ടിവന്നു. പതിനൊന്ന് പേഴ്സണല്‍ സ്റ്റാഫ് അംഗങ്ങളുടെ ചെലവ്  95,88,444 രൂപ.  വിവിധ പഠനങ്ങള്‍ നടത്തിയതിന് ഏജന്‍സികള്‍ക്ക് 11,80,530, സെന്റര്‍ ഫോര്‍ മാനേജ്മെന്റ് ഡവലപ്മെന്റ് അഞ്ചുലക്ഷം രൂപ, ഹൈദരാബാദ്്, പൂനെ എന്നിവിടങ്ങളിലേക്ക് പഠനയാത്രകള്‍ നടത്തിയതിന് 1,27,073 രൂപ, ഐഎംജി ശില്‍പ്പശാലയ്‌ക്ക്് 57,800 രൂപ. കംപ്യൂട്ടര്‍, ലാപ്ടോപ്പ്്  സ്‌കാനര്‍, പ്രിന്റര്‍ എന്നിവയ്‌ക്ക് 6,50,632 രൂപ, പുതിയ ജീവനക്കാരുടെ അലവന്‍സ് നല്‍കാന്‍ 3,67,33,267 രൂപ എന്നിങ്ങനെയാണ് മറ്റു ചെലവുകള്‍.  

സംസ്ഥാനത്ത് രൂക്ഷമായ സാമ്പത്തിക പ്രതിസന്ധി നിലനില്‍ക്കുമ്പോഴാണ് ഭരണപരിഷ്‌കാര കമ്മീഷന്‍ കോടിക്കണക്കിന് രൂപ ദുര്‍വ്യയം ചെയ്യുന്നതെന്നാണ് ആക്ഷേപം ഉയരുന്നത്.