തിരുവനന്തപുരം: അന്തര്സംസ്ഥാന സ്വകാര്യബസ് ബുക്കിങ് ഏജന്സി ലൈസന്സിന് ഇനി തൊഴിലാളികള്ക്ക് പോലീസ് ക്ലിയറന്സ് സര്ട്ടിഫിക്കറ്റ് നിര്ബന്ധം. ലൈസന്സ്ഡ് ഏജന്റ് ഫോര് പബ്ലിക് ട്രാന്സ്പോര്ട്ട് (എല്എപിടി) പുതുക്കുമ്പോഴും പുതിയത് നല്കുമ്പോഴും ഈ മാനദണ്ഡങ്ങള് കര്ശനമായി പാലിക്കണമെന്ന് ഗതാഗത സെക്രട്ടറി ജ്യോതിലാല് പുറത്തിറക്കിയ സര്ക്കുലറില് വ്യക്തമാക്കുന്നു.
ബുക്കിങ് ഏജന്സികളിലെയും വാഹനത്തിലെയും തൊഴിലാളികള്ക്ക് ക്രിമിനല് പശ്ചാത്തലമില്ലെന്നുള്ള പോലീസ് ക്ലിയറന്സ് സര്ട്ടിഫിക്കറ്റ് നിര്ബന്ധമാക്കി. യാത്രാവഴിയില് 50 കിലോമീറ്റര് ഇടവിട്ടുള്ള സ്ഥലങ്ങളിലെ ടോയ്ലെറ്റ്, റിഫ്രഷ്മെന്റ് സൗകര്യത്തെക്കുറിച്ചുള്ള വിവരം യാത്രക്കാര്ക്ക് ലഭ്യമാക്കണം. വാഹനം, ജീവനക്കാര്, യാത്രക്കാര്, ഹെല്പ്പ്ലൈന് നമ്പറുകള്, പോലീസ്, മോട്ടോര്വാഹന, വിമന് ഹെല്പ്പ്ലൈനുകള് എന്നിവയുടെ വിവരം ടിക്കറ്റിലുണ്ടാവണം. വാഹനം ബ്രേക്ക്ഡൗണ് ആയാല് പകരം സൗകര്യമേര്പ്പെടുത്താന് ലൈസന്സിക്കോ ഓപ്പറേറ്റര്ക്കോ സംവിധാനമുണ്ടാകണം. ബുക്കിങ് ഓഫീസിന് കുറഞ്ഞത് 150 ചതുരശ്രഅടി വിസ്തീര്ണം ഉണ്ടാവണം. സ്ത്രീകള് ഉള്പ്പെടെ പത്ത് യാത്രക്കാര്ക്കെങ്കിലും ഇരിക്കുന്നതിനുള്ള സ്ഥലം, ടോയ്ലെറ്റ്, ലോക്കര് സംവിധാനത്തോടെയുള്ള ക്ലോക്ക്റൂം, ആറു മാസം വരെ വീഡിയോ സൂക്ഷിക്കാന് ശേഷിയുള്ള സിസി ടിവി, കുടിവെള്ളം, അഗ്നിശമന സംവിധാനങ്ങള് എന്നിവ ഓഫീസിലുണ്ടാകണം. പോലീസിന്റെയും ആര്ടിഒയുടെയും ഫോണ് നമ്പറുകളും വിമന് ഹെല്പ്പ്ലൈന് നമ്പറും പ്രദര്ശിപ്പിക്കണമെന്നും സര്ക്കുലറില് പറയുന്നു.
ബസ്സുകള് നിര്ത്തുന്നതിന് മതിയായ സ്ഥലം ഉറപ്പ് വരുത്തണം. കെഎസ്ആര്ടിസി ബസ് സ്റ്റാന്ഡിന്റെ 500 മീറ്റര് പരിധിയില് ബുക്കിങ് ഓഫീസോ പാര്ക്കിങ് സ്ഥലമോ പാടില്ല. ബുക്കിങ് ഓഫീസിന്റെ പേരും ലൈസന്സ് നമ്പറും മുന്വശത്ത് കാണാനാവും വിധം സ്ഥാപിക്കണം. ബസ് ഓപ്പറേറ്റര്മാരുടെ പേരും ഫോണ് നമ്പറുകളും പ്രദര്ശിപ്പിക്കണം. വാഹനങ്ങളുടെ സമയക്രമം യാത്രക്കാര്ക്ക് കാണാനാവും വിധം എഴുതി പ്രദര്ശിപ്പിക്കണം. വാഹനങ്ങള് എവിടെയെത്തിയെന്നത് ഡിജിറ്റല് സംവിധാനത്തിലൂടെ അറിയിക്കണം. യാത്ര ആരംഭിക്കുന്നതിന് മുമ്പ് വാഹനത്തിലെ ജീവനക്കാരുടെ പേരും നമ്പരും നല്കണമെന്നും സര്ക്കുലര് നിര്ദേശിക്കുന്നു. യാത്രക്കാരുടെ ലഗേജ് അല്ലാതെയുള്ള സാധനങ്ങളും നിയമവിരുദ്ധ വസ്തുക്കളും വാഹനത്തില് കൊണ്ടുപോകരുതെന്നും പുതിയ മാനദണ്ഡത്തില് പറയുന്നു.
ഇന്നലെ മാത്രം പിടികൂടിയത്
200 വാഹനങ്ങള്
മോട്ടോര് വാഹനവകുപ്പിന്റെ ഓപ്പറേഷന് നൈറ്റ് റൈഡേഴ്സില് ഇന്നലെ മാത്രം നിയമലംഘനം കണ്ടെത്തിയത് 200 വാഹനങ്ങളില്. ഇവയില് നിന്ന് 6.44 ലക്ഷം രൂപ പിഴയീടാക്കി. ഒരു തവണത്തെ റൗണ്ട് ട്രിപ്പിന് പെര്മിറ്റ് എടുത്ത ശേഷം രണ്ടാം ദിവസവും യാത്രക്കാരുമായി വന്ന അന്തര്സംസ്ഥാന വാഹനത്തെ വയനാട്ടില് നിന്ന് പിടികൂടി. 1.55 ലക്ഷം രൂപ ഈ വാഹനത്തില് നിന്നു മാത്രം പിഴയീടാക്കി. അമിത വേഗത്തില് ഓടിയ ബസ് കഴിഞ്ഞ ദിവസം പിടികൂടിയിരുന്നു.
