തൃശൂര്: ‘ഞങ്ങള്ക്ക് ഞങ്ങളുടെ രാമനെ തിരിച്ചു തരൂ’… തൃശൂര് കളക്ടറുടെ ഫേസ്ബുക്ക് കമന്റ് ബോക്സില് നിറഞ്ഞു തുളുമ്പുന്ന അപേക്ഷയാണിത്. കൊമ്പന് തെച്ചിക്കോട്ടുകാവ് രാമചന്ദ്രന്റെ എഴുന്നള്ളിപ്പ് നിരോധനത്തിനെതിരെയാണ് ആനപ്രേമികളുടെ പ്രതിഷേധവും അപേക്ഷയും. അനുപമ. ടി.വി ഐഎഎസ് എന്ന ഔദ്യോഗിക അക്കൗണ്ടിലെ വിഷു ആശംസാ പോസ്റ്റിനു താഴെയാണ് കമന്റുകള് നിറഞ്ഞിരിക്കുന്നത്.
‘മാഡം ഞങ്ങളുടെ രാമനെ ഞങ്ങള്ക്ക് വിട്ടുതരണം’ എന്നാണ് ഒരാളുടെ കമന്റ്, മറ്റൊരാളുടെ അപേക്ഷ ‘മാഡം ഞങ്ങള്ക്ക് രാമനില്ലാതെ പറ്റില്ല, പ്ലീസ് വിട്ടുതരണം’ എന്നാണ്. ‘ഒരുപാട് കഷ്ടപ്പെട്ടാണ് ഞങ്ങള് രാമന് വേണ്ടി സമരം ചെയ്തത്, അതിനുശേഷം രാമന്റെ വിലക്ക് മാറ്റി എന്നാണ് അധികാരികള് ഉറപ്പ് നല്കിയത്. ഞങ്ങളെ ഇനിയും വിഷമിപ്പിക്കരുത്. ഇതിന് പിന്നില് ഞങ്ങള്ക്കൊരു കപട ഉദ്ദേശ്യവുമില്ല,
ഞങ്ങളുടെ രാമനോടുള്ള അതിയായ സ്നേഹം മാത്രമേയുള്ളള്ളു, ‘ഞങ്ങളുടെ രാമനെ തിരിച്ചുതരൂ.. ഇത് അപേക്ഷയാണ്. നിരോധിക്കാന് വേറെന്തൊക്കെയുണ്ട്, ഞങ്ങളുടെ രാമനെ തന്നെ വേണോ..’, ‘എല്ലാ ജില്ലയിലേക്കും വേണ്ട മാഡം, തൃശൂര് ജില്ലയില് മാത്രം മതി. അതിനും കഴിയില്ലെങ്കില് തൃശൂര് പൂരത്തിനെങ്കിലും വിലക്കൊന്ന് മാറ്റാമോ..’ എന്നിങ്ങനെ പോകുന്നു കമന്റുകളും അപേക്ഷകളും.
ഫെബ്രുവരിയില് ഗുരുവായൂര് ചേമ്പാലക്കുളം ക്ഷേത്രത്തിലെ ഉത്സവത്തോടനുബന്ധിച്ച് സ്വകാര്യവ്യക്തിയുടെ വീട്ടുമുറ്റത്ത് രാമചന്ദ്രനെ എഴുന്നെള്ളിപ്പിച്ചതിനിടെയുണ്ടായ സംഭവത്തില് രണ്ടുപേരുടെ ജീവന് നഷ്ടപ്പെട്ടിരുന്നു. ഇതിന് ശേഷമാണ് തെച്ചിക്കോട്ടുകാവ് രാമചന്ദ്രനെ എഴുന്നെള്ളിപ്പുകളില് നിന്ന് വിലക്കിയത്. വിലക്കിനെതിരെ ഈ മാസം ആദ്യവാരത്തില് ആനഉടമസ്ഥ സംഘത്തിന്റെയും ഫെസ്റ്റിവല് കോര്ഡിനേഷന് കമ്മിറ്റിയുടേയും നേതൃത്വത്തില് തൃശൂരില് പ്രതിഷേധ സായാഹ്നം സംഘടിപ്പിച്ചിരുന്നു.
കൃഷിമന്ത്രി വി.എസ്. സുനില്കുമാര് അടക്കം എല്ലാ രാഷ്ടീയ പാര്ട്ടികളുടേയും പ്രതിനിധികള് സമരത്തില് പങ്കെടുത്ത് ഐക്യദാര്ഢ്യം പ്രഖ്യാപിച്ചിരുന്നു. അതിന് ശേഷം ഏപ്രില് 10ന് തിരുവനന്തപുരത്ത് നടന്ന യോഗത്തില് രാമചന്ദ്രനെ തൃശൂര് ജില്ലയില് ഒന്നിടവിട്ട ദിവസങ്ങളിലായി ആഴ്ചയില് മൂന്ന് ദിവസം എഴുന്നെള്ളിക്കാനുള്ള അനുമതി മന്ത്രിമായ കെ. രാജു, വി.എസ്. സുനില്കുമാര് എന്നിവര് ആന ഉടമസ്ഥ സംഘത്തിന്റെയും ഫെസ്റ്റിവല് കോര്ഡിനേഷന് കമ്മിറ്റിയുടേയും നേതാക്കള്ക്ക് നല്കിയിരുന്നു. എന്നാല് ഇത് തെരഞ്ഞെടുപ്പ് മുന്നില് കണ്ട് നടത്തിയ കാപട്യമായിരുന്നെന്ന് തിരിച്ചറിഞ്ഞത് മുതലാണ് ആരാധകര് കളക്ടറുടെ ഫേസ്ബുക്കില് പൊങ്കാലയുമായെത്തിയത്.
അതേ സമയം രാമചന്ദ്രന് വിലക്കേര്പ്പെടുത്തിയ നിലപാടിനെ അനുകൂലിച്ചും ധാരാളം കമന്റുകള് വരുന്നുണ്ട്. ‘രാമനെ എഴുന്നെള്ളിക്കാതിരിക്കുന്നതാണ് ഏറ്റവും സേഫ്റ്റി’, ‘തെച്ചിക്കോട്ടുകാവ് രാമചന്ദ്രന് വരുന്നതിന് മുന്പും തൃശൂര് പൂരവും തെക്കേ ഗോപുരനട തള്ളിത്തുറക്കലും ഉണ്ടായിരുന്നു, രാമചന്ദ്രന്റെ കാലശേഷവും ഇതൊക്കെ മുറപോലെ നടക്കും’ എന്നൊക്കെയാണ് എഴുന്നെള്ളിപ്പ് വിലക്കിനെ അനുകൂലിക്കുന്നവര്ക്ക് പറയാനുള്ളത്.
