തിരുവനന്തപുരം: ദുരൂഹ സാഹചര്യത്തില് കോവളത്തു നിന്നും ഡ്രോണ് കണ്ടെടുത്തു. കോവളം, കൊച്ചുവേളി തീരദേശപ്രദേശങ്ങളില് രാത്രിയില് പോലീസ് പെട്രോളിങ് നടത്തുന്നതിനിടയിലാണ് ഡ്രോണ് ക്യാമറ പറത്തുന്നത് കണ്ടെത്തിയത്. വിക്രം സാരാഭായ് സ്പേസ് റിസര്ച്ച് സെന്റര് ഉള്പ്പടെയുള്ള അതീവ സുരക്ഷാ മേഖലകളിലാണ് ഡ്രോണ് പറത്തിയതിനാല് സംഭവത്തില് പോലീസും ഇന്റലിജന്സും അന്വേഷണം ആരംഭിച്ചു കഴിഞ്ഞു.
പ്രദേശത്ത് ഷൂട്ടിങ് നടത്താനായി ഡ്രോണ് പറത്താറുണ്ട്. എന്നാല് ഇത് പകല് മാത്രമേ നടത്താറുള്ളൂ. പോലീസ് അനുമതി ഇല്ലാതെ അര്ധരാത്രി ആരാണ് ഡ്രോണ് പറത്തിയതെന്നാണ് അന്വേഷിക്കുന്നത്.
പുല്വാമ ഭീകരാക്രമണത്തെ തുടര്ന്ന് കേരളം ഉള്പ്പടെയുള്ള തീരമേഖലകളില് അതീവജാഗ്രത പാലിക്കണമെന്ന് കേന്ദ്ര ആഭ്യന്തരമന്ത്രാലയം കര്ശന നിര്ദേശം നല്കിയിരുന്നു. ഈ സാഹചര്യത്തിലാണ് അര്ധരാത്രിയില് കോവളത്ത് ദുരൂഹസാഹചര്യത്തില് ഡ്രോണ് പറത്തിയത് ശ്രദ്ധയില്പ്പെട്ടിരിക്കുന്നത്.
