വിശ്വാസം അതല്ലേ എല്ലാം എന്നത് വെറും പരസ്യവാചകമല്ലെന്ന് തെളിയിക്കുകയാണ് തെരഞ്ഞെടുപ്പുകാലം. കടുത്ത നിരീശ്വരവാദികളെയും വിശ്വാസികളാക്കുന്ന ഒരു മാന്ത്രികതയുണ്ട് ഈ കാലത്തിന്. ഉത്സവങ്ങളും പള്ളിപ്പെരുന്നാളുകളുമെല്ലാം കൊണ്ടാടുന്നതിനിടയ്ക്ക് വന്നുകയറിയ തെരഞ്ഞെടുപ്പായതുകൊണ്ട് ആരെയും എവിടെയും പ്രതീക്ഷിക്കാം എന്നതാണ് അവസ്ഥ. പൊങ്കാല അടുപ്പിന്മൂട്ടിലും കുതിരക്കാലിലുമൊക്കെ കെട്ടിവീണുകിടപ്പാണ് ഇപ്പോള് സ്വയം പ്രഖ്യാപിത ഈശ്വരന്മാര്.
മണ്ഡലകാലത്ത് കേരളത്തിലുടനീളം നടന്ന നിരീശ്വരവാദികളുടെ പേക്കൂത്തിന് താത്വികമായി ന്യായീകരണം നല്കിയ സിപിഐക്കാരാണ് ഇപ്പോള് കറുപ്പുടുത്തില്ലേലും തങ്ങളെ കാത്തോളണേ എന്ന് അമ്പലവാതിലില് മുട്ടുന്നത്. തിരുവനന്തപുരത്തെ സ്ഥാനാര്ത്ഥി സി. ദിവാകരന് തൊഴുത് പ്രസാദവും വാങ്ങിയാണ് വെളുക്കെച്ചിരിക്കുന്നതെങ്കില് അടൂര് എംഎല്എയും മാവേലിക്കരയിലെ സ്ഥാനാര്ത്ഥിയുമായ ചിറ്റയം ഗോപകുമാറാണ് താനും ഒരു വിശ്വാസിയാണെന്ന് പ്രഖ്യാപിച്ച് കളത്തിലിറങ്ങിയത്.
വിശ്വാസികള്ക്ക് തെരഞ്ഞെടുപ്പിലെ വിപണിമൂല്യം കണ്ടുള്ള കളിയാണ് ഇതെന്ന് മണ്ഡലകാലം മറക്കാത്തവര്ക്കെല്ലാം മനസ്സിലായിട്ടുണ്ട്. എന്നാലും മറവിരോഗം ആര്ക്കാനും ഉണ്ടെങ്കില് ആ വോട്ടെങ്കിലും കിട്ടിയാലോ എന്നാണ് ആര്ത്തി. അതിന് സ്ഥാനാര്ത്ഥിയാണെന്ന് കേട്ട പാടേ ചിറ്റയം വെച്ചുപിടിച്ചത് ശബരിമല തന്ത്രിയെ കാണാനാണ്. കൂടെ കുടപിടിച്ച് ചെങ്ങന്നൂര് എംഎല്എയും. ശബരിമല നട അടച്ചിടുമെന്ന് പറയാന് തന്ത്രി ആരാന്ന് ചോദിച്ചവരാരും ഇപ്പോള് ഇല്ല. എല്ലാം മായയാണത്രെ.
പത്തനാപുരത്ത് ഗണേശന്റെ തിരുമുമ്പിലെത്തിയപ്പോള് ചിറ്റയം പറഞ്ഞത് തന്റെയത്ര പെരുത്ത് വിശ്വാസമുള്ള ഒരാളെ കാണാന് പ്രയാസമാണെന്നാണ്. ഗണേശന് പിന്നെ തനിക്ക് വേണ്ടി പ്രാര്ത്ഥിക്കാനും വേറെ ആളെ വെക്കുന്നത്രയും പെരുത്ത വിശ്വാസിയാണ്. അതിപ്പോള് ഹല്ലേലുയ്യാ വിളിച്ചായാലും വേണ്ടില്ല. കാര്യം നടക്കണം. അത്രേ ഉള്ളൂ.
സിപിഎമ്മിലെ ഏറ്റവും മുന്തിയ മാന്യനായ സി. ശിവന്കുട്ടി നേമത്ത് ഒ. രാജഗോപാലിനെ തോല്പിക്കാന് പെന്തക്കോസ്തുകാരുടെ അടുത്ത് ധ്യാനം കൂടിയതിന്റെ പടവും പാട്ടുമൊക്കെ വൈറലാണിപ്പോള്. മാര്ക്സിസ്റ്റായിരിക്കുമ്പോള്ത്തന്നെ സിന്ധുജോയിക്ക് സ്വര്ഗസ്ഥനായ പിതാവേ എന്ന് നാലാളു കാണെ പാടി വോട്ട് പിടിക്കാമെങ്കില്പ്പിന്നെ ഗണേശനും ശിവന്കുട്ടിക്കുമൊക്കെ ആകാമെന്നതാണ് ഒരു ന്യായം. അല്ലെങ്കില് തന്നെ തങ്കുപാസ്റ്ററും ബിഷപ്പ് യോഹന്നാനും ചെറുവള്ളി വിമാനത്താവളവും പിണറായി സഖാവുമൊക്കെയായുള്ള വിശ്വാസത്തിന്റെ ഒരു ഉള്വിളിയിലാണല്ലോ കാര്യങ്ങളുടെ കിടപ്പ്.
എല്ലാവരുടെയും ബോസായ ടിക്കാറാം മീണ കൂടി മലയുടെ കാര്യത്തില് അയഞ്ഞ സ്ഥിതിക്ക് ഈ മലകയറാന് കുറഞ്ഞത് ഒരു മതേതര മത വിശ്വാസിയുടെ കുപ്പായമെങ്കിലും ഇട്ടില്ലെങ്കില് എന്ത് വൈരുദ്ധ്യാത്മക ഭൗതികവാദമാണ്. നമുക്കും കിട്ടണം വോട്ട് എന്നല്ലാതെ.
