വെണ്ണികോട്-വക്കം അപ്രോച്ച്‌റോഡ് യാഥാര്‍ഥ്യമാകുന്നു 

ചിറയിന്‍കീഴ്: വെണ്ണികോട്-പണയില്‍ക്കടവ്-വക്കം അപ്രോച്ച്‌റോഡ് യാഥാര്‍ഥ്യമാകുന്നു. റോഡിന്റെ നിര്‍മാണോദ്ഘാടനം 30ന് വൈകിട്ട് 4.30ന് നിര്‍വഹിക്കും. വെണ്ണികോട് നിന്ന് വക്കത്തേക്ക് പോകുന്ന അപ്രോച്ച് റോഡ് നിര്‍മിക്കുക എന്ന നാട്ടുകാരുടെ നീണ്ടകാല സ്വപ്‌നമാണ് യാഥാര്‍ത്ഥ്യമാകുന്നത്.

2005ല്‍ വക്കം-പണയില്‍ക്കടവ് പാലം പൂര്‍ത്തീകരിച്ചതിനൊപ്പം വക്കം-പണയില്‍ക്കടവില്‍ നിന്ന് വെണ്ണികോട്ടേക്ക് വരുന്ന അപ്രോച്ച് റോഡിന് സര്‍ക്കാര്‍ പൊന്നുംവിലയ്‌ക്ക് സ്വകാര്യ വ്യക്തികളില്‍ നിന്ന് സ്ഥലമേറ്റെടുത്തു. എന്നാല്‍ ഏതാനും വ്യക്തികള്‍ റോഡ് നിര്‍മിക്കാന്‍ സ്ഥലം വിട്ടുകൊടുക്കാതെ കോടതിയെ സമീപിക്കുകയും തുടര്‍ന്ന് അപ്രോച്ച് റോഡിന്റെ നിര്‍മാണം തടസ്സപ്പെടുകയും ചെയ്തു.

റോഡിന് സ്ഥലം വിട്ടുതരാതിരുന്ന നാലു കുടുംബങ്ങള്‍ക്കും നഷ്ടപരിഹാരം നല്‍കുന്നതിന് സര്‍ക്കാര്‍ ഫണ്ടില്‍ നിന്നും 25 ലക്ഷം രൂപ അനുവദിച്ചു. നാലുകുടുബങ്ങള്‍ക്കും നഷ്ടപരിഹാരം നല്‍കി സ്ഥലം പൊതുമരാമത്ത് ഏറ്റെടുത്തു. തുടര്‍ന്ന് എസ്റ്റിമേറ്റ് തയ്യാറാക്കി 2 കോടി 18 ലക്ഷം രൂപ ബജറ്റില്‍ ടെണ്ടര്‍ നടപടി പൂര്‍ത്തീകരിച്ചു. തുടര്‍ന്നാണ് നിര്‍മാണം ആരംഭിക്കുന്നത്.

800 മീറ്റര്‍ നീളത്തിലും 12 മീറ്റര്‍ വീതിയിലുമാണ് നിര്‍മിക്കുക. അതില്‍ 7മീറ്റര്‍ വീതിയില്‍ റോഡും ഫുട്പാത്തും ആവശ്യമുള്ളിടങ്ങളില്‍ ഓട, ട്രാഫിക്‌സുരക്ഷാസിഗ്‌നലുകള്‍ ഇതെല്ലാം ഉള്‍പ്പെടുത്തി ആധുനിക രീതിയിലുള്ള (ബിഎംബിസി) നിലവാരത്തിലാണ് റോഡിന്റെ നിര്‍മാണം. അപ്രോച്ച്‌റോഡിന്റെ നിര്‍മാണോദ്ഘാടനം അഡ്വ ബി. സത്യന്‍ എംഎല്‍എ തറക്കല്ലിട്ട് നിര്‍വഹിക്കും.