മുണ്ടക്കയം: കോരുത്തോട് കുഴിമാവ് കാളകെട്ടി ശബരിമല പാതയില് കൂടുതല് സുരക്ഷാ ക്രമീകരണങ്ങളും വാഹനങ്ങളുടെ അമിതവേഗം നിയന്ത്രിക്കാന് പൊലീസ് പരിശോധനയും ശക്തമാക്കണമെന്ന് ആവശ്യം.
കുമളി തമിഴ്നാട് തുടങ്ങിയ സ്ഥലങ്ങളില് നിന്ന് എത്തുന്ന തീര്ത്ഥാടകര് പ്രധാനമായും ആശ്രയിക്കുന്ന റോഡാണിത്. വളവുകളും തിരിവുകളും നിറഞ്ഞ റോഡില് വാഹനങ്ങള് അമിതവേഗത്തില് എത്തുന്നത് അപകടസാധ്യതയും വര്ധിപ്പിക്കുന്നു. വീതികുറഞ്ഞ റോഡില് വാഹനങ്ങളുടെ അമിതവേഗം മൂലം യാത്രികര് ഭീതിയോടെയാണു നടക്കുന്നത്.
വണ്ടന്പതാല് തേക്കിന്കൂപ്പില് ഉള്പ്പെടെ ഒട്ടേറെ അപകടവളവുകളാണു പാതയില് ഉള്ളത്.
പനക്കച്ചിറ പാറമടയില് ഇറക്കത്ത് അപകടങ്ങള് നിത്യസംഭവമായ വളവുകളിലും മടുക്ക കോസഡി കുത്തിറക്കത്തിലെ വളവുകളിലും വഴിപരിചയമില്ലാത്ത തീര്ഥാടകര് അമിതവേഗത്തിലാണു യാത്ര. വേഗം കുറയ്ക്കാന് മുന്നറിയിപ്പു ബോര്ഡുകള് ഇല്ല.
മുണ്ടക്കയം–എരുമേലി പാതയില് കണ്ണിമലയില് പൊലീസിന്റെ താല്ക്കാലിക എയ്ഡ് പോസ്റ്റ് പ്രവര്ത്തിക്കും പോലെ മടുക്ക കേന്ദ്രമായും പൊലീസ് എയ്ഡ് പോസ്റ്റ് സ്ഥാപിക്കണമെന്നും ആവശ്യമുണ്ട്.
