കണ്ണൂര്: ക്ഷീരകൃഷി തൊഴിലുറപ്പുപദ്ധതിയില് ഉള്പ്പെടുത്താന് കേന്ദ്രസര്ക്കാര് തയാറാവണമെന്ന് മന്ത്രി അഡ്വ.കെ.രാജു ആവശ്യപ്പെട്ടു. ഏച്ചൂര് സി.ആര് ഓഡിറ്റോറിയത്തില് ജില്ലാ ക്ഷീരകര്ഷക സംഗമം ഉദ്ഘാടനം ചെയ്യുകയായിരുന്നു മന്ത്രി.
ഇപ്പോള് സംസ്ഥാനത്തിന് ആവശ്യമുള്ള പാലിന്റെ 85 ശതമാനം ഇവിടെ ഉല്പാദിപ്പിക്കുന്നുണ്ട്. 15 ശതമാനത്തിന്റെ കുറവ് അടുത്ത വര്ഷം മറികടക്കാന് കഴിയും. ഈ ഉല്പാദിപ്പിക്കുന്ന പാല് നല്ല വില നല്കി സംഭരിക്കാന് മില്മ തയറാവണമെന്നും മന്ത്രി ആവശ്യപ്പെട്ടു. കര്ഷകരില്നിന്ന് പാല് വാങ്ങി വില കൂട്ടി വില്ക്കാന് മാത്രമല്ല മില്മ. പാല് മൂല്യവര്ധിത ഉല്പ്പന്നങ്ങളാക്കി ലാഭമുണ്ടാക്കി അതിന്റെ പങ്ക് കര്ഷകര്ക്ക് നല്കണം. അന്യസംസ്ഥാനങ്ങളില്നിന്ന് വരുന്ന പാലിന്റെ ഗുണമേന്മ ഉറപ്പുവരുത്താന് പാലക്കാട് മീനാക്ഷിപുരത്ത് ലാബ് ആരംഭിച്ചു. പാറശ്ശാലയിലും ആര്യങ്കാവിലും ഉടന് ലാബ് തുടങ്ങും.
കണ്ണൂര് ജില്ലയിലെ 19 മൃഗാശുപത്രികളില് 18ലും വെറ്ററിനറി ഡോക്ടര്മാരെ നിയമിച്ചു. ഒഴിവുള്ളിടങ്ങളില് ഉടന് നിയമനം നടത്തും. കണ്ണൂര് ജില്ലയിലെ തലശ്ശേരി, പയ്യന്നൂര്, തളിപ്പറമ്പ് ബ്ലോക്ക് പഞ്ചായത്തുകളിലും നാല് പഞ്ചായത്തുകളെ ഉള്പ്പെടുത്തി ആലക്കോട് ആസ്ഥാനമായും ഡയറി സോണ് പദ്ധതി നടപ്പിലാക്കുമെന്ന് മന്ത്രി അറിയിച്ചു. ഈ പദ്ധതിയിലൂടെ ഓരോ സോണിനും ഓരോ വര്ഷം 50 ലക്ഷം രൂപ വീതം അനുവദിക്കും. തുടര് പദ്ധതിയായി രണ്ടര കോടി രൂപ അനുവദിക്കുമെന്നും മന്ത്രി അറിയിച്ചു.
ചടങ്ങില് അധ്യക്ഷത വഹിച്ച മന്ത്രി രാമചന്ദ്രന് കടന്നപ്പള്ളി മൊബൈല് ആപ് പ്രകാശനം നിര്വഹിച്ചു. സണ്ണി ജോസഫ് എംഎല്എ, ജില്ലാ പഞ്ചായത്ത് പ്രസിഡന്റ് കെ.വി.സുമേഷ്, എടക്കാട് ബ്ലോക്ക് പഞ്ചായത്ത് പ്രസിഡന്റ് എം.സി.മോഹനന്, ജില്ലാ പഞ്ചായത്ത് വികസനകാര്യ സ്ഥിരം സമിതി ചെയര്മാന് വി.കെ.സുരേഷ്ബാബു, മുണ്ടേരി ഗ്രാമപഞ്ചായത്ത് പ്രസിഡണ്ട് എ.പങ്കജാക്ഷന്, ക്ഷീരകര്ഷക ക്ഷേമനിധി ചെയര്മാന് അഡ്വ.എന്.രാജന്, കേരള ഫീഡ്സ് ചെയര്മാന് കെ.എസ്.ഇന്ദുശേഖരന് നായര്, മലബാര് മേഖലാ ക്ഷീരോല്പാദക യൂനിയന് ചെയര്മന് കെ.എന്.സുരേന്ദ്രന് നായര്, എടക്കാട് ബ്ലോക്ക് പഞ്ചായത്ത് വൈസ് പ്രസിഡണ്ട് പി.ലിസി, ജില്ലാ പഞ്ചായത്തംഗം കെ.മഹിജ, കോര്പറേഷന് പൊതുമരാമത്ത് സ്ഥിരം സമിതി ചെയര്മാന് ടി.ഒ.മോഹനന്, ബ്ലോക്ക് പഞ്ചായത്തംഗങ്ങളായ പി.സി.അഹമ്മദ് കുട്ടി, സി.ബാലകൃഷ്ണന് മാസ്റ്റര്, ക്ഷീരകര്ഷക ക്ഷേമനിധി ബോര്ഡ് ഡയറക്ടര് കെ.ശശീന്ദ്രന് മാസ്റ്റര്, മലബാര് മേഖലാ ക്ഷീരോല്പാദക യൂനിയന് ഡയറക്ടര് ജോസഫ് പരവന് പറമ്പില്, മലബാര് മേഖലാ യൂനിയന് ഡയറക്ടര് എം.എം.ജോസഫ് എന്നിവര് ക്ഷീരസംഘങ്ങളെയും ക്ഷീരകര്ഷകരെയും ആദരിക്കലും വിവിധ മത്സരവിജയികള്ക്കുള്ള സമ്മാനദാനവും നിര്വഹിച്ചു. ക്ഷീരവികസന വകുപ്പ് ഡയറ്കടര് എബ്രഹാം ടി.ജോസഫ് പദ്ധതി വിശദീകരിച്ചു. മുണ്ടേരി ക്ഷീരോല്പാദക സഹകരണ സംഘം വൈസ് പ്രസിഡന്റ് കട്ടേരി പ്രകാശന് സ്വാഗതവും കണ്ണൂര് ക്ഷീരവികസന വകുപ്പ് ഡെപ്യൂട്ടി ഡയറക്ടര് ജെയിന് ജോര്ജ് നന്ദിയും പറഞ്ഞു.
ക്ഷീരവികസന വകുപ്പിന്റെയും ജില്ലയിലെ ക്ഷീരോല്പാദക സഹകരണ സംഘങ്ങള്, ത്രിതല പഞ്ചായത്തുകള്, ആത്മ കണ്ണൂര് എന്നിവയുടെയും ആഭിമുഖ്യത്തിലുള്ള ക്ഷീരസംഗമത്തിന് മുണ്ടേരി ക്ഷീരോല്പാദക സഹകരണ സംഘമാണ് ആതിഥേയത്വം വഹിച്ചത്.
