ഇടുക്കി: ഓഖി ചുഴലിക്കാറ്റിനെ തുടര്ന്ന് ഹൈറേഞ്ച് മേഖലയില് താറുമാറായ വൈദ്യുതിബന്ധം പുനസ്ഥാപിക്കുന്നതിനായി വകുപ്പിന് കീഴില് നടന്നത് യുദ്ധകാല അടിസ്ഥാനത്തിലുള്ള പ്രവര്ത്തനങ്ങള്.
ഇന്നലെ വൈകിട്ടോടെ ഏകദേശം 75 ശതമാനം മേഖലകളിലെയും പ്രശ്നങ്ങള് പരിഹരിക്കാനായതായി തൊടുപുഴ എക്സിക്യൂട്ടീവ് എഞ്ചിനീയര് വിന്സന്റ് വര്ഗീസ് ജന്മഭൂമിയോട് പറഞ്ഞു. കട്ടപ്പന ഡിവിഷനില് ആകെയുള്ള 845 ട്രാന്സ്ഫോര്മറുകളില് 795 എണ്ണവും ചാര്ജ് ചെയ്യാനായിട്ടുണ്ട്.
തമിഴ്നാട് അതിര്ത്തി മേഖലകളിലാണ് പ്രധാനമായും പ്രശ്നങ്ങളുള്ളതെന്നും അദ്ദേഹം പറഞ്ഞു. പീരുമേട്ടില് ആകെയുള്ള 618 ട്രാന്സ്ഫോര്മറുകളില് നാലെണ്ണം കൂടിയാണ് ഇനി ചാര്ജ് ചെയ്യാനുള്ളത്. കുമളി, നെടുങ്കണ്ടം മേഖലകളിലാണിത്. ഇന്നലെ മഴ മാറിയത് പണി എളുപ്പം തീരുന്നതിന് സഹായകമായി എന്നും അദ്ദേഹം പറഞ്ഞു.
വൈദ്യുതിബന്ധം ഉള്ഗ്രാമങ്ങളിലടക്കം എത്താന് ഇനിയും ദിവസങ്ങളെടുക്കും. ഇവിടെ പോസ്റ്റുകള് എത്തിക്കാനാകാത്തതാണ് പ്രധാനവെല്ലുവിളി. അവധി ആയിട്ടും ഫീല്ഡ് ജോലിക്കാര് എല്ലാവരും രണ്ട് ദിവസമായി ജോലിയിലുണ്ട്.
