പള്ളുരുത്തി: വധൂവരന്മാരുമായി പള്ളിമുറ്റത്ത് എത്തിയ കാറിന് തീപിടിച്ചു. നാട്ടുകാരുടെ ഇടപെടലില്‍ അത്യാഹിതം ഒഴിവായി. ഞായറാഴ്ച രാവിലെ 11.30 ഓടെ പെരുമ്പടപ്പ് സാന്റക്രൂസ് പള്ളിയങ്കണത്തിലാണ് സംഭവം.
വിവാഹദിന കുര്‍ബ്ബാനയ്‌ക്കായി വധൂവരന്മാരെ കയറ്റിക്കൊണ്ടുവന്ന ഇന്‍ഡിക്ക കാറിനാണ് തീപിടിച്ചത്. വധുവും വരനും കാറില്‍ നിന്നിറങ്ങി നിമിഷങ്ങള്‍ക്കകം കാറിന്റെ ബോണറ്റ് ഭാഗത്തു നിന്നും പുകയുയരുകയും തീ പടര്‍ന്ന് പിടിക്കുകയുമായിരുന്നു.
കാറിന്റെ ബോണറ്റ് ഭാഗം ഇളക്കിമാറ്റിയ ശേഷം നാട്ടുകാര്‍ ചേര്‍ന്ന് വെള്ളമൊഴിച്ച് തീയണക്കുകയായിരുന്നു. സംഭവമറിഞ്ഞ് സ്ഥലത്തെത്തിയ അഗ്നിശമനസേന തുടര്‍ രക്ഷാ പ്രവര്‍ത്തനങ്ങളില്‍ പങ്കാളികളായി. ബാറ്ററി ഷോര്‍ട്ടായതാകാം തീ പിടിത്തത്തിന് കാരണമെന്ന് അഗ്നിശമനസേന ഉദ്യോഗസ്ഥര്‍ പറഞ്ഞു. ഒന്നര ലക്ഷം രൂപയുടെ നഷ്ടം കണക്കാക്കുന്നു.
പ്രതികരിക്കാൻ ഇവിടെ എഴുതുക: