തിരുവനന്തപുരം: ഭിന്നശേഷിക്കാരുടെ ക്ഷേമസംഘടന സക്ഷമയുടെ ആഭിമുഖ്യത്തില് എഡിഐപി മൂല്യനിര്ണയ ക്യാമ്പ് നടത്തും. കരമന ഗവ. ബോയ്സ് ഹൈസ്കൂളില് നാളെ രാവിലെ 10 ന് ആരംഭിക്കുന്ന ക്യാമ്പ് ഒ. രാജഗോപാല് എംഎല്എ ഉദ്ഘാടനം ചെയ്യും.
കേന്ദ്രസാമൂഹ്യശാക്തീകരണമന്ത്രാലയം ദിവ്യാംഗര്ക്ക് ഉപകരണങ്ങള് നല്കുന്നതിനുള്ള പദ്ധതിയാണ് എഡിഐപി. പദ്ധതിവഴി വീല്ചെയറുകള്, എല്ബോ ക്രച്ചസുകള്, ഹോള്ഡിംഗ് വാക്കര്, ശ്രവണസഹായികള്, ട്രൈപാഡ് ആന്റ് ടെക്ട്രാ പോസ്, വാക്കിംഗ് സ്റ്റിക്, വയ്പുപല്ലുകള് തുടങ്ങിയവയാണ് ലഭ്യമാകുന്ന ഉപകരണങ്ങള്. പ്രതിമാസവരുമാനം 15,000 രൂപ വരെയുള്ളവര്ക്ക് പൂര്ണസഹായം ലഭ്യമാക്കും. വരുമാനം 15,000 മുതല് 20,000 രൂപവരെയുള്ളവര്ക്ക് ഉപകരണത്തിന്റെ ചെലവിന്റെ 50 ശതമാനം നല്കും. ബിപിഎല് കാര്ഡുള്ളവര്ക്കും മുതിര്ന്ന പൗരന്മാര്ക്കും ആനുകൂല്യങ്ങള്ക്ക് മുന്ഗണന നല്കും.
ഒ. രാജേഗാപാല് എംഎല്എയുടെ ശ്രമഫലമായി ജില്ലയിലെ മുഴുവന് ഭിന്നശേഷിക്കാര്ക്കും പ്രയോജനപ്രദമായ ഉപകരണങ്ങള് ലഭ്യമാക്കാന് അനുമതി ലഭിച്ചു. ഇതിന്പ്രകാരം അര്ഹരായവരെ കണ്ടെത്തുന്നതിനാണ് നോഡല് ഏജന്സിയായി സക്ഷമയെ തെരഞ്ഞെടുത്തത്. ക്യാമ്പുകള് കുറ്റമറ്റതാക്കുന്നതിനും അനുബന്ധശേഖരണത്തിനുമായി സക്ഷമ, സേവാഭാരതി, ആരോഗ്യഭാരതി, സാമൂഹ്യക്ഷേമ പ്രവര്ത്തകര് ഉപഭോക്താക്കളുടെ വീടുകളിലെത്തി ആവശ്യമായ രേഖകള് ശേഖരിക്കും. 40 ശതമാനത്തില് കൂടുതല് വൈകല്യമുള്ളവര്ക്ക് നിരാമയ, സ്വാവലംബന് എന്നീ ഇന്ഷുറന്സ് പദ്ധതികളും പരിചയപ്പെടുത്തും.
