ചിറയന്കീഴ്: കിഴുവിലം വലിയഏലാ പാടശേഖരത്തിന്റെ ഭാഗമായ തോട്ടവാരം പാടശേഖത്തില് വയല് നികത്തുന്നു. അധികാരികള് നിസംഗതയില്. കഴിഞ്ഞദിവസം കിഴുവിലം പഞ്ചായത്തിലെ തോട്ടവാരം പാടശേഖരത്തിലെ വയലുകള് കരമണ്ണ് ഉപയോഗിച്ച് നികത്താനുള്ള സ്വകാര്യവ്യക്തിയുടെ ശ്രമം നാട്ടുകാര് ഇടപെട്ട് തടഞ്ഞു.
പാടശേഖത്തിന്റെ വിവിധ ഭാഗങ്ങളില് രാത്രിയുടെ മറവില് വയല് നികത്തുന്നതിന് റവന്യൂ അധികൃതരുടെ മൗനാനുവാദമുണ്ടെന്നും ആക്ഷേപം. ചിറയിന്കീഴും പരിസരങ്ങളിലും വളരെക്കാലമായി ഇല്ലായിരുന്ന വയല് നികത്തല് അധികാരികളുടെ ഒത്താശയോടെ തിരിച്ചുവന്നത് ജനങ്ങളെ ആശങ്കപ്പെടുത്തുന്നു. ചിറയിന്കീഴ് കിഴുവിലം അടിയിക്കലം വലിയഏല പടശേഖത്തിന്റെ പടിഞ്ഞാറുഭാഗത്തെ മുപ്പതുസെന്റ് ഭൂമി സ്വകാര്യവ്യക്തി മണ്ണിട്ട് നികത്തുകയായിരുന്നു. രാത്രികാലങ്ങളില് വലിയ വാഹനങ്ങളില് കരമണ്ണ് എത്തിച്ചാണ് നിലം നികത്തിയത്. ഇരുപതോളം ലോഡ് മണ്ണ് ഇതിനകം വയലില് നിക്ഷേപിച്ചു. വിവരം അറിഞ്ഞെത്തിയ നാട്ടുകാര് സംഘടിച്ച് നികത്തല് തടയുകയായിരുന്നു. കിഴുവിലം പഞ്ചായത്തിലെ ഏറ്റവും വലിയ പാടശേഖരമാണ് വലിയഏല. എഴുപത് ഹെക്ടര് പാടശേഖരം ഇന്ന് പല ഭാഗങ്ങളിലും നികത്തി പകുതിക്ക് താഴെ മാത്രമായി. പാടശേഖര സംരക്ഷണ സമിതിയുടെ വിലക്ക് ലംഘിച്ചാണ് നികത്തല് നടന്നത്.
വയല് നികത്തല് അധികാരികളുടെ ശ്രദ്ധയില്പ്പെടുത്തിയെങ്കിലും നടപടി ഉണ്ടായില്ല. തുടര്ന്നാണ് നാട്ടുകാര് ഇടപെട്ട് തടഞ്ഞത്. ഒരു കാലത്ത് 70 ഹെക്ടറുണ്ടായിരുന്ന പാടശേഖരത്തില് നിലവില് 10 ഹെക്ടറിന് താഴെയാണ് കൃഷി ചെയ്യുന്നത്.
തരിശായികിടക്കുന്ന ബാക്കിയുള്ള പാടശേഖരത്തു കൂടി കൃഷി നടത്തുന്നതിനുള്ള പരിശ്രമങ്ങള് വിവിധ സംഘടനകളുടെ ഭാഗത്തുനിന്ന് ഉണ്ടാകുന്നതിനിടയിലാണ് വയല്നികത്തല് ധൃതഗതിയില് തുടരുന്നത്.
