അമ്പലപ്പുഴ: മണ്ഡലകാലത്തെ വരവേല്ക്കാന് അയ്യപ്പന്റെ മാതൃസ്ഥാനമായ അമ്പലപ്പുഴഒരുങ്ങി. അയ്യപ്പഭക്തസംഘത്തിന്റെ നേതൃത്വത്തില് നടക്കുന്ന ആഴിപൂജകളും 51 ദിവസത്തെ അന്നദാനവുമാണ് പ്രധാനം. സമൂഹപ്പെരിയോന് കളത്തില് ചന്ദ്രശേഖരന് നായര് പൂജകള്ക്ക് മുഖ്യകാര്മ്മികത്വം വഹിക്കും. ഓരോ കരയിലെയും കരപ്പെരിയോന്മാര് സഹ കാര്മ്മികരാകും.
21 ആഴിപൂജകളാണ് ഈവര്ഷമുള്ളത്. ആദ്യ ആഴിപൂജ അയ്യപ്പന് കളരി അഭ്യാസം പഠിച്ച ചീരപ്പന്ചിറയില് 18ന് നടക്കും. 26ന് പഴവീട് ഭഗവതീക്ഷേത്രം, 30ന് പള്ളിക്കാവ് ദേവീക്ഷേത്രം, ഡിസംബര് ഒന്നിന് കോമന അടിമന ദേവീക്ഷേത്രം, 2ന് മല്ലശ്ശേരി മഹാദേവക്ഷേത്രം, ആറിന് പായല്കുളങ്ങര ദേവീക്ഷേത്രം, 8ന് പുതുക്കുളങ്ങര ദേവീക്ഷേത്രം, 9ന് മല്ലശ്ശേരി മഹാദേവക്ഷേത്രം, 10ന് അമ്പലപ്പുഴ ശ്രീകൃഷ്ണസ്വാമി ക്ഷേത്രം, 11ന് പ്ലാക്കുടി ക്ഷേത്ര, 2ന് തേവരുനട ക്ഷേത്രം, മൂന്നിന് ഭൈരവസ്വാമി ക്ഷേത്രം, 17ന് ചേന്നാട് വീട്, 20ന് പനയന്നാര്കാവ് ദേവീക്ഷേത്രം, 22ന് അമ്പലപ്പുഴ ശ്രീകൃഷ്ണസ്വാമി ക്ഷേത്രം, 23ന് കായിപ്പള്ളി ദേവീക്ഷേത്രം, 24ന് കോവില്പറമ്പ് ശങ്കരനാരായണ ക്ഷേത്രം, 25ന് കാഞ്ഞൂര് മഠം ദേവീക്ഷേത്രം, 30ന് രാജവിലാസം വെള്ളറട, ജനുവരി2ന് പനയന്നാര്കാവ് ദേവീക്ഷേത്രം, എന്നിവിടങ്ങളിലാണ് ആഴിപൂജകള് നടക്കുക.
പത്തു നാള് നീളുന്ന ശബരിമല തീര്ത്ഥാടനം ജനുവരി ആറിന്ആരംഭിക്കും.
പമ്പാ സര്വീസ് ഇന്നു മുതല്
ആലപ്പുഴ: മണ്ഡലകാലത്ത് ഇത്തവണയും പ്രത്യേക സര്വീസുകളുമായി കെഎസ്ആര്ടിസി. ബുധനാഴ്ച മുതല് സര്വീസ് ആരംഭിക്കും. പതിവ് പോലെ ആലപ്പുഴ ബസ് സ്റ്റേഷനില് നിന്ന് രാത്രി ഒന്പതിന് പുറപ്പെട്ട് മുല്ലയ്ക്കല് ക്ഷേത്രം, പഴവീട് ക്ഷേത്രം വഴി ചങ്ങനാശ്ശേരിയില് എത്തി അവിടുന്ന് പത്തനംതിട്ട വഴി രാത്രി 1.30 മണിയോടെ പമ്പയില് എത്തിചേരും. 124 രൂപയാണ് ടിക്കറ്റ് നിരക്ക്, റിസര്വേഷന് ചാര്ജ് 15 രൂപ. വിവരങ്ങള്ക്ക്: 0477 2252501.
