അമ്പലപ്പുഴ: തോട്ടപ്പള്ളി ഫിഷിങ് ഹാര്ബറില് ദുരൂഹ സാഹചര്യത്തില് വീണ്ടും നമ്പര് തിരുത്തി വന്ന മീന് ലോറിയെ നിസ്സാര കുറ്റം ചുമത്തി അമ്പലപ്പുഴ പോലീസ് രക്ഷിച്ചു. കഴിഞ്ഞ ദിവസം നമ്പര് തിരുത്തി ദേശീയ പതാകയോട് അനാദരവ് കാട്ടിയ ലോറിയമായി തമിഴ്നാട് സ്വദേശിയെ ക്രിമിനല് കുറ്റം ചുമത്തി റിമാന്റ് ചെയ്തിരുന്നു.
സൈനുദ്ദീന് എന്ന ആളുടെ ഉടമസ്ഥതയിലുള്ള ബിസ്മില്ല എന്ന കൂറ്റന് കണ്ടയ്നര് ലോറിയാണ് ഇന്നലെ രാവിലെ ഹാര്ബറില് എത്തിയത്. സംഭവം അറിഞ്ഞ ബിഎംഎസ് തൊഴിലാളികള് അടക്കം തോട്ടപ്പള്ളി കോസ്റ്റല് പോലീസില് വിവരം അറിയിക്കുകയും കോസ്റ്റല് പോലിസ് അമ്പലപ്പുഴ പോലീസിന് ലോറി കസ്റ്റഡിയില് എടുത്ത് നല്കുകയുമായിരുന്നു. ലോറി പിടികൂടിയ അമ്പലപ്പുഴ പോലീസ് നമ്പര് തിരുത്തിയത് നിസ്സാര കുറ്റമായി കണ്ട് പെറ്റി അടിച്ച് ലോറി വിട്ടു നല്കി.
മത്സ്യ കച്ചവടത്തിന്റെ മറവില് ഹാര്ബറുകള് കേന്ദ്രീകരിച്ച് വന് കള്ളനോട്ട് ഇടപാടുകളും ,ഭീകരപ്രവര്ത്തനവും നടന്നിട്ടുള്ള നിരവധി സംഭവങ്ങള് ഉണ്ടായിരിക്കേ തോട്ടപ്പള്ളി ഹാര്ബറില് ഇത്തരത്തില് ലോറികള് എത്തുന്നത് പോലീസ് നിസ്സാരവല്ക്കരിക്കുകയാണ്. ഇത്തരത്തില് ഉള്ള ലോറികള്ക്ക് മത്സ്യം എടുത്തു നല്കുന്നവര്ക്ക് മതമൗലികവാദികളുമായി ബന്ധമുണ്ടന്നും മത്സ്യതൊഴിലാളികള് ആരോപിക്കുന്നു.
ഹാര്ബറില് മത്സ്യബന്ധന വള്ളങ്ങള് അടുക്കാതിരുന്ന സമയത്ത് രാത്രി കാലങ്ങളില് ഏതാനും വര്ഷം മുമ്പ്വില കൂടിയ കാറുകളില് അപരിചിതര് വന്നു പോകുന്നതായി പ്രദേശവാസികള് ആരോപിച്ചിരുന്നു. ഇത്തരം സാഹചര്യം നിലനില്ക്കേ ഇത്തരത്തില് നമ്പര് തിരുത്തി എത്തുന്ന ലോറികളെക്കുറിച്ച് ബന്ധപ്പെട്ട ഉദ്യോഗസ്ഥര് അന്വഷിക്കണം എന്ന് ആവശ്യം ഉയര്ന്നു കഴിഞ്ഞു. ഇന്നലെ ഹാര്ബറില് എത്തിയ ലോറിയുടെ മുന്ഭാഗത്ത് കെഎല്07 എല്13 28 എന്നും വശങ്ങളില് കെഎല് 42 എല് 1328 എന്നുമാണ് രേഖപ്പെടുത്തിയത് .
