ഏറ്റുമാനൂര്: ചൂരക്കുളങ്ങര ശ്രീ ഭദ്രകാളി ക്ഷേത്രത്തില് ശനിയാഴ്ച്ച രാവിലെ 10മുതല് ആയില്യംപൂജ, സര്പ്പം പാട്ട്,അന്നദാനം എന്നിവ നടത്തപ്പെടും ക്ഷേത്രം മേല്ശാന്തി പി.നീലകണ്ഠന് നമ്പൂതിരി മുഖ്യകാര്മികത്വം വഹിക്കും.
പെരുവ: പെരുവ നരസിംഹസ്വാമി ക്ഷേത്രത്തിന്റെ ഉപക്ഷേത്രമായ ചടയന്കാവില് ശനിയാഴ്ച ആയില്യം പൂജ നടക്കും. രാവിലെ 9ന് ജ്യോതിഷകേസരി കെ.എന്.പി. നമ്പൂതിരിയുടെ മുഖ്യകാര്മ്മികത്വത്തില് നൂറും പാലും, സര്പ്പപൂജയും നടത്തുമെന്ന് ദേവസ്വം ഭാരവാഹികള് അറിയിച്ചു.
നീലൂര്: നീലൂര് ശ്രീധര്മ്മശാസ്താക്ഷേത്രത്തിലെ ആയില്യംപൂജ നാളെ ക്ഷേത്രം മേല്ശാന്തിയുടെ മുഖ്യകാര്മ്മികത്വത്തില് നടത്തും. ആയില്യം പൂജ, ഇളനീര് അഭിഷേകം, നൂറുംപാലും, അര്ച്ചന, മഞ്ഞള്പ്പൊടി സമര്പ്പണം, സര്പ്പംപാട്ട് എന്നിവ നടക്കും.
കാരിക്കോട്: കാരിക്കോട് മനയ്ക്കപ്പടി നാഗരാജ ക്ഷേത്രത്തിലെ തുലാം ആയില്യം നടതുറപ്പു മഹോത്സവം നാളെ നടക്കും. രാവിലെ 11.30ന് താലപ്പൊലിയും, വാദ്യമേളങ്ങളുടെ അകമ്പടിയോടെ അനന്തഫണം എഴുന്നള്ളിപ്പും നടക്കും. കരമന കുമാരവിലാസം ഉമാദേവി ഭദ്രദീപം തെളിയിക്കും. തുടര്ന്ന് സുഗത ശങ്കര് അനന്തഫണത്തില് മാല ചാര്ത്തും.
