കോട്ടയം: കഴിഞ്ഞ 24 വര്ഷക്കാലമായി കേരളാകോണ്ഗ്രസ് മാണി വിഭാഗം കോട്ടയം ജില്ലാപ്രസിഡന്റായിരുന്ന ഇ.ജെ.ആഗസ്തിയെ പ്രസിഡന്റ് സ്ഥാനത്ത് നിന്ന് നീക്കം ചെയ്തതില് പാര്ട്ടിയിലെ ഒരു വിഭാഗം പടയൊരുക്കത്തിന്. കഴിഞ്ഞ ജില്ലാ പഞ്ചായത്ത് തെരഞ്ഞെടുപ്പുമായി ബന്ധപ്പെട്ട് സിപിഎം പിന്തുണ സ്വീകരിച്ചതില് പ്രതിഷേധിച്ച് ഇ.ജെ. ആഗസ്തി പാര്ട്ടി ജില്ലാ പ്രസിഡന്റ് പദവിയില് നിന്ന് രാജിവെച്ചപ്പോള് പാര്ട്ടിയിലെ പ്രബലവിഭാഗം ആഗസ്തിക്കൊപ്പമായിരുന്നു. പിന്നീട് കെ.എം.മാണി നേരിട്ടെത്തി ആഗസ്തിയെ ആശ്വസിപ്പിച്ചാണ് രാജി പിന്വലിച്ചത്. എന്നാല് ജോസ് കെ.മാണിയെ പിന്തുണയ്ക്കുന്ന വിഭാഗത്തിന്റെ ആഗസ്തിയോടുള്ള എതിര്പ്പ് കൂടുകയായിരുന്നു. തുടര്ന്ന് കെ.എംമാണിയുടെ എക്കാലത്തെയും വിശ്വസ്തനായിരുന്ന ഇ.ജെ. ആഗസ്തിയെ തന്നെ കഴിഞ്ഞ ദിവസം നടന്ന തെരഞ്ഞെടുപ്പിന്റെ മറവില് വെട്ടി നിരത്തി.
ആഗസ്തിക്ക് പകരക്കാരനായി ജോസ് കെ.മാണിയുടെ നോമിനി പുതിയ ജില്ലാ പ്രസിഡന്റായതും പാര്ട്ടിയില് പുതിയ പടലപ്പിണക്കങ്ങള്ക്ക് ശക്തിയേറി. പുതിയ പ്രസിഡന്റ് ജില്ലാ കമ്മിറ്റിക്ക് മുന്നോടിയായി ജില്ലയൊട്ടാകെ സഞ്ചരിച്ച് നേതാക്കളെ നേരിട്ട് കണ്ട് വരണാധികാരിക്ക് കത്തും നല്കിയിരുന്നു. തുടര്ന്ന് തെരഞ്ഞെടുപ്പ് നടന്നാല് തനിക്ക് വോട്ട് കിട്ടുമെന്ന് ഉറപ്പുള്ള എല്ലാ നേതാക്കളെയും ജില്ലാ കമ്മിറ്റി തെരഞ്ഞെടുപ്പിലേക്ക് നേരിട്ട് ക്ഷണിച്ച് വിജയം ഉറപ്പിച്ചിരുന്നു. ഇതിനിടയില് പാലായില് നിന്നുള്ള ഒരു വിഭാഗം ഒത്തുതീര്പ്പ് സ്ഥാനാര്ത്ഥിയായി പാലായിലെ ഒരു പ്രമുഖ സഹകാരിയെയും രംഗത്തിറക്കിയിരുന്നു. എന്നാല് ഇ. ജെ. ആഗസ്തി കെ.എം.മാണിയെ നേരില് കണ്ട് തനിക്ക് ഒരവസരംകൂടി നല്കണമെന്നും മത്സര താല്പര്യവും അറിയിച്ചിരുന്നു.
ആഗസ്തി തുടരുന്നതില് കെ.എം.മാണിക്ക് എതിര്പ്പില്ല എന്ന ഉറപ്പും വാങ്ങിയിരുന്നു. എന്നാല് ജോസ് കെ.മാണി പക്ഷം വെമ്പള്ളി സ്വദേശിയായ സണ്ണി തെക്കേടത്തിന്റെ പിന്നില് ഉറച്ചു നിന്നത് ഇ.ജെ.ആഗസ്തിയുടെ വിജയസാദ്ധ്യതകള്ക്ക് മങ്ങലേല്പ്പിച്ചു. ഇതോടൊപ്പം പാലാ മുന് മുന്സിപ്പല് കൗണ്സിലര് കുര്യാക്കോസ് പടവന്റെ നേതൃത്വത്തില് ഒരു വിഭാഗം ഇ.ജെ. ആഗസ്തിക്കായി കമ്മിറ്റിയില് വാദിച്ചു. എന്നാല് പാര്ട്ടി പിളര്ന്നാല് ജോസഫ് വിഭാഗത്തില് പോകുവാന് സാദ്ധ്യതയുള്ള മുഴുവന് നേതാക്കളെയും ഒഴിവാക്കിയ കൂട്ടത്തില് ജോസ് കെ.മാണി ഇടപെട്ട് ഇ.ജെ. ആഗസ്തിയെയും ഒഴിവാക്കുകയായിരുന്നു. ആഗസ്തിക്കായി സി.എഫ്. തോമസും തോമസ് ചാഴിക്കാടനും വാദിച്ചിരുന്നു. യുവജന വിഭാഗം നേതാക്കള് ‘കിളിപോയ കിളവന്’ എന്ന് കളിയാക്കി ആഗസ്തിക്കെതിരെ പ്രചാരണം നടത്തി. എക്കാലത്തും യുഡിഎഫില് ഉറച്ചു നിന്നിരുന്ന ഇ.ജെ. ആഗസ്തിക്ക് കേരളാ കോണ്ഗ്രസ് യുഡിഎഫ് വിട്ടത് ഒരുവിധത്തിലും ഇഷ്ടപ്പെട്ടിരുന്നില്ല.
കേരളാ കോണ്ഗ്രസ്സില് മൂന്ന് വിഭാഗമായാണ് ഇപ്പോള് നേതാക്കള് പ്രവര്ത്തനം നടത്തുന്നത്. ഇത് കേരളാ കോണ്ഗ്രസ്സ് പ്രതിഭാസമായ വളരും തോറും പിളരുന്ന നടപടിയിലേക്ക് എത്താനുള്ള സാധ്യതകള്ക്ക് ആക്കം കൂട്ടിയിട്ടുണ്ടെന്ന് അണികള് തന്നെ സാക്ഷ്യപ്പെടുത്തുന്നു.
