പൊന്നാനി: ആര്‍എസ്എസ് പ്രവര്‍ത്തകനെ തീകൊളുത്തി കൊല്ലാന്‍ ശ്രമം. പൊന്നാനി നഗര്‍ ശാരീരിക് ശിക്ഷണ്‍ പ്രമുഖ് ഷൈമോദിന നേരെയാണ് കഴിഞ്ഞ ദിവസം രാത്രി ആക്രമണമുണ്ടായത്.
ബൈക്കില്‍ സഞ്ചരിക്കുകയായിരുന്ന ഷൈമോദിന്റെ ദേഹത്തേക്ക് ദേശീയപാതയില്‍ ഉറൂബ് നഗറില്‍ വെച്ച് മറ്റൊരു ബൈക്കിലെത്തിയ രണ്ടംഗസംഘം പെട്രോള്‍ നിറച്ച പ്ലാസ്റ്റിക് ബാഗ് എറിയുകയായിരുന്നു. ദേഹത്ത് മുഴുവന്‍ പെട്രോള്‍ വീണു. സിഗരറ്റ് ലൈറ്റര്‍ ഉപയോഗിച്ച് തീകൊളുത്താന്‍ ശ്രമിക്കുന്നതിനിടെ തൊട്ടടുത്ത് ഇടവഴിയിലേക്ക് ഷൈമോദ് വാഹനം ഓടിച്ചുകയറ്റി. അതുകൊണ്ട് മാത്രമാണ് രക്ഷപ്പെട്ടതെന്ന് ഷൈമോദ് പറഞ്ഞു. സംഘത്തിലെ ഒരാളെ തിരിച്ചറിയാമെന്ന് കാണിച്ച് പോലീസില്‍ പരാതി നല്‍കി.
കുറച്ചുനാളുകളായി പൊന്നാനി മേഖലയില്‍ സിപിഎം വ്യാപകമായി അക്രമം നടത്തുകയാണ്. ദിവസങ്ങള്‍ക്ക് മുമ്പ് ആര്‍എസ്എസ് മണ്ഡല്‍ കാര്യവാഹിനെ ഓട്ടോറിക്ഷയിലെത്തിയ ഒരുസംഘം ആക്രമിച്ചിരുന്നു. ആക്രമണത്തില്‍ ഇടത് ചെവിയുടെ കേള്‍വി നഷ്ടപ്പെട്ട ഇദ്ദേഹം തൃശ്ശൂരിലെ സ്വകാര്യ ആശുപത്രിയില്‍ ചികിത്സതേടിയിരുന്നു.
പരാതി നല്‍കുന്നുണ്ടെങ്കിലും രാഷ്‌ട്രീയ ഇടപെടല്‍ മൂലം പോലീസ് നടപടി സ്വീകരിക്കാന്‍ വിമൂഖത കാണിക്കുകയാണ്. പോലീസ് അനാസ്ഥ തുടര്‍ന്നാല്‍ ശക്തമായ പ്രക്ഷോഭം സംഘടിപ്പിക്കുമെന്ന് നേതാക്കള്‍ അറിയിച്ചു.
പ്രതികരിക്കാൻ ഇവിടെ എഴുതുക: