കൊച്ചി: മന്ത്രി തോമസ് ചാണ്ടിയുടെ കൈയേറ്റക്കേസില് സിപിഎം-സിപിഐ പോര് പുതിയ തലത്തില്. ഇരു പാര്ട്ടികളും പോര്വിളി മുഴക്കി നേര്ക്കു നേര് ഏറ്റുമുട്ടുകയാണ്. സിപിഎം പിന്തുണയോടെ ചാണ്ടിക്ക് അനുകൂലമായ നിലപാടു സ്വീകരിക്കുന്ന അഡ്വ. ജനറല് സുധാകരപ്രസാദിനെ റവന്യൂ മന്ത്രി ഇ. ചന്ദ്രശേഖരനും സിപിഐ സംസ്ഥാന സെക്രട്ടറി കാനം രാജേന്ദ്രനും ഇന്നലെ കണക്കറ്റ് വിമര്ശിച്ചു.
മുഖ്യമന്ത്രി പിണറായി വിജയന്റെയും സിപിഎമ്മിന്റെയും പിന്തുണയുള്ള എജിയാകട്ടെ മന്ത്രിക്ക് പുല്ലുവില കല്പ്പിച്ചിട്ടില്ലാത്ത മട്ടിലുള്ള പ്രസ്താവനയുമായാണ് പ്രതികരിച്ചത്. എന്തുവില നല്കിയും തോമസ് ചാണ്ടിയെ സിപിഎം രക്ഷിക്കുമെന്ന വ്യക്തമായ സൂചനയാണ് ഇതുവരെയുള്ള സംഭവവികാസങ്ങള് നല്കുന്നത്. കായല് കൈയേറ്റം സംബന്ധിച്ച കേസ് അനുഭവ സമ്പത്തുള്ള അഡീഷണല് അഡ്വ. ജനറല് രഞ്ജിത്ത് തമ്പാനെ ഏല്പ്പിക്കണമെന്നാവശ്യപ്പെട്ട് മന്ത്രി, സുധാകരപ്രസാദിന,് കത്തു നല്കിയിരുന്നു. എന്നാല് കത്തിനു മറുപടി നല്കാതെ എജി മാധ്യമങ്ങളിലൂടെയാണ് മന്ത്രിക്ക് ചുട്ട മറുപടി നല്കിയത്. കേസ് ആര്ക്കു നല്കണമെന്ന് താന് തീരുമാനിക്കുമെന്നു പറഞ്ഞ എജി റവന്യൂ വിഷയങ്ങള് ആരുടെയും തറവാട്ടു സ്വത്തല്ലെന്നും തുറന്നടിച്ചു.
എജിയുടെ ഈ നിലപാടിനെ രൂക്ഷമായി വിമര്ശിച്ച മന്ത്രി തന്റെ കത്തിന് മറുപടി നല്കാത്ത എജിയുടെ നടപടി ഒട്ടും ശരിയായില്ലെന്ന് ഇന്നലെ തിരിച്ചടിച്ചു. കത്തിന് മറുപടി നല്കാത്തത് ശരിയാണോയെന്ന് എജി ചിന്തിക്കണം. കത്തിനുള്ള മറുപടി വാര്ത്താ സമ്മേളനത്തിലല്ല നല്കേണ്ടത്. എജിയുടെ വാക്കുകള്ക്ക് മറുപടി പറയാന് എന്റെ സംസ്ക്കാരം അനുവദിക്കുന്നില്ല. റവന്യൂവുമായി ബന്ധപ്പെട്ടകേസുകള് നടത്തി പരിചയമുള്ളയാളാണ് രഞ്ജിത്ത്. അതിനാല് തോമസ് ചാണ്ടിയുമായി ബന്ധപ്പെട്ട കേസ് അദ്ദേഹത്തിനു തന്നെ നല്കണം. കേരളത്തിലെ മൂന്നരക്കോടി ജനങ്ങളുടെ റവന്യൂ താല്പ്പര്യം സംരക്ഷിക്കുന്ന വകുപ്പിന്റെ തലവനാണ് ഞാന്. വകുപ്പില് എന്തു നടക്കണമെന്ന് തീരുമാനിക്കുന്നതും ഞാനാണ്. കാസര്കോട്ട് വാര്ത്താ സമ്മേളനത്തില് മന്ത്രി പറഞ്ഞു.
പാര്ട്ടി സംസ്ഥാന സെക്രട്ടറി കാനം രാജേന്ദ്രനും എജിയെ രൂക്ഷമായി വിമര്ശിച്ചു. സര്ക്കാരിനും മന്ത്രിക്കും മുകളിലല്ല എജി. ഭരണഘടനാപരമായ പദവിയാണ് എജിയുടേത്. പക്ഷെ പ്രവര്ത്തനം നിയമാനുസൃതമാകണം, കാനം പറഞ്ഞു. തെറ്റുകാരനെന്ന് ബോധ്യപ്പെട്ടാല് ചാണ്ടിക്കെതിരെ നടപടി ഉണ്ടാകുമെന്നും കാനം തൊടുപുഴയില് വാര്ത്താ സമ്മേളനത്തില് വ്യക്തമാക്കി.
വെള്ളിയാഴ്ച മാധ്യമങ്ങളെ കണ്ട എജി ഇന്നലെ വാര്ത്താക്കുറിപ്പ് ഇറക്കിയാണ് മന്ത്രിയെ നേരിട്ടത്. തോമസ് ചാണ്ടിക്കെതിരായ കേസില് സ്റ്റേറ്റ് അറ്റോര്ണി സോഹനെയാണ് നിയോഗിച്ചത്. ഇദ്ദേഹത്തെ മാറ്റില്ല. കേസ് രഞ്ജിത്ത് തമ്പാന് കൈമാറില്ല. കേസ് മാറ്റിക്കൊടുത്ത ചരിത്രവും ഇല്ല. ഒരു കേസിനോടും പ്രത്യേക താല്പ്പര്യവുമില്ല. എജി സുധാകരപ്രസാദ് പറഞ്ഞു.
വിഷയത്തില് നേരിട്ടിടപെട്ടിട്ടില്ലെങ്കിലും എജിയുടെ ഓരോ നീക്കവും മുഖ്യമന്ത്രിയുടെ നിര്ദ്ദേശപ്രകാരമാണെന്നാണ് വിലയിരുത്തല്. അല്ലാതെ ഒരു മന്ത്രിയെ വെല്ലുവിൡക്കാനും മന്ത്രിയുടെ കത്ത് ചവറ്റുകൊട്ടയിലിടാനും എജി മുതിരില്ല. മുന്നണിയിലെ രണ്ടാമത്തെ വലിയ കക്ഷിയെ അവഗണിക്കാനും അവരുടെ നിലപാടിനെ മറികടന്ന് തോമസ് ചാണ്ടിയെ രക്ഷിക്കാനും മുഖ്യമന്ത്രിയും പാര്ട്ടിയും ശ്രമിക്കുന്നത് ഉപകാരസ്മരണകളാണെന്നാണ് സംശയം.
