കാസര്കോട്: അന്താരാഷ്ട്ര മാര്ക്കറ്റില് കോടികള് വിലവരുന്ന മൂന്ന് മാന്കൊമ്പുകളും സംരക്ഷിത ഇനത്തില്പെട്ട 11 ആമകളുമായി നാലംഗ സംഘത്തെ കാസര്കോട് ഫോറസ്റ്റ് ഉദ്യോഗസ്ഥര് അറസ്റ്റ് ചെയ്തു. മൊഗ്രാലിലെ മുഹമ്മദ് അബ്ദുല്ല മൊയ്തീന് (46), മൊഗ്രാല്പുത്തൂരിലെ വി.ഇമാം അലി (49), മായിപ്പാടിയിലെ കരീം (40), മൊഗ്രാല് കൊപ്രബസാറിലെ ബി.എം.ഖാസിം (55) എന്നിവരെയാണ് ഡിഎഫ്ഒ എം.രാജീവന്, കാസര്കോട് ഫോറസ്റ്റ് റേഞ്ച് ഓഫീസര് എന്.അനില്കുമാര് എന്നിവരുടെ നേതൃത്വത്തില് അറസ്റ്റ് ചെയ്തത്.
ഇന്നലെ ഉച്ചയോടെ കുമ്പള പേരാല്കണ്ണൂരില് വെച്ചാണ് രണ്ട് ആള്ട്ടോ കാറുകളിലായി കലമാന് കൊമ്പുകളും ആമകളുമായി പ്രതികളെ ഫോറസ്റ്റ് ഉദ്യോഗസ്ഥര് പിടികൂടിയത്. ഇവര് സഞ്ചരിച്ച കാറുകളും പോലീസ് കസ്റ്റഡിയിലെടുത്തു. മുംബൈയിലെ ഒരു സംഘത്തിന് കൈമാറാന് വേണ്ടി മാന്കൊമ്പുകളും ആമകളും സുരക്ഷിത സ്ഥലത്തേക്ക് മാറ്റുന്നതിനിടയിലാണ് വനം വകുപ്പ് ഉദ്യോഗസ്ഥര് ഇവരെ പിടികൂടിയത്. രണ്ട് മാസം മുമ്പ് ലഭിച്ച രഹസ്യവിവരത്തിന്റെ അടിസ്ഥാനത്തില് ഇവര്ക്കുവേണ്ടി ഫോറസ്റ്റ് ഉദ്യോഗസ്ഥര് അന്വേഷണത്തിലായിരുന്നു. എസ്കോര്ട്ട് ആയി ബൈക്കില് പോയ സംഘത്തിലെ ചിലര് രക്ഷപ്പെട്ടു. ഉത്തരേന്ത്യയില് പൂജ ആവശ്യത്തിനായും മറ്റും മാന്കൊമ്പും ആമകളും ഉപയോഗിക്കുന്നുണ്ടെന്ന് ഫോറസ്റ്റ് ഉദ്യോഗസ്ഥര് പറയുന്നു.
അമേരിക്കയില് മാന്കൊമ്പിനും ആമകള്ക്കും വലിയ ഡിമാന്റാണുള്ളത്. വിദേശത്തേക്ക് കടത്തിയാല് കോടികളാണ് ഇതിന് വിലവരുന്നത്. ഷെഡ്യൂള് ഒന്ന് ഇനത്തില്പ്പെട്ട നാല് വെള്ള ആമകളും ഷെഡ്യൂള് നാല് ഇനത്തില്പ്പെട്ട ഏഴ് ബ്ലാക്ക് ആമകളുമാണ് പിടിച്ചെടുത്തവയിലുള്ളത്. അഞ്ചു ലക്ഷത്തിനാണ് ഇവ വില പറഞ്ഞുവെച്ചതെന്ന് പ്രതികള് വനംവകുപ്പ് ഉദ്യോഗസ്ഥരോട് വെളിപ്പെടുത്തി. വന് ശൃംഖലതന്നെ ഇതിനു പിന്നില് പ്രവര്ത്തിക്കുന്നുണ്ടെന്നും അന്വേഷണം വ്യാപിപ്പിക്കുമെന്നും അധികൃതര് വ്യക്തമാക്കി.
സംഘത്തില് ഡപ്യൂട്ടി ഫോറസ്റ്റ് റേഞ്ച് ഓഫീസര് വി.ആര് ഷാജീവ്, ഫോറസ്റ്റ് ഓഫീസര്മാരായ ചന്ദ്രന് നായര്, വി.വി.രാജഗോപാലന്, എം.കെ.നാരായണന്, ബീറ്റ് ഓഫീസര്മാരായ കെ.ധനഞ്ജയന്, കാഞ്ഞങ്ങാട് റേഞ്ച് ബീറ്റ് ഓഫീസര് ഹരി, സിവില് പോലീസ് ഓഫീസര്മാരായ ഷൗക്കത്ത്, ജോഷി ജോസഫ്, ധനേഷ്, ഡ്രൈവര്മാരായ രമേശന്, രാഹുല് എന്നിവരും ഉണ്ടായിരുന്നു.
