പന്തളം: അയല്‍വാസിയായ യുവതിയെ കൊലപ്പെടുത്താന്‍ ശ്രമിച്ച യുവാവിനെ പോലീസ് അറസ്റ്റു ചെയ്തു. മെഴുവേലി ആലക്കോട് ഒറ്റപ്ലാംമൂട്ടില്‍ സുനീഷ് (27) ആണ് അറസ്റ്റിലായത്.ഇന്നലെ രാവിലെ എട്ടേകാലോടെയാണ് അയല്‍വാസിയായ കാഞ്ഞിരംകുന്നേല്‍ ഹര്‍ഷ(20)യെ ആണ് ഇയാള്‍ കൊല്ലാന്‍ ശ്രമിച്ചത്. കോഴഞ്ചേരിയിലെ കോളേജില്‍ വിദ്യാര്‍ത്ഥിനിയായ യുവതി കോളേജിലേക്കു പോകുന്ന വഴിയില്‍ ഒളിച്ചിരുന്നാണ് ആക്രമിച്ചത്. യുവതി ധരിച്ചിരുന്ന ഷാള്‍ ഉപയോഗിച്ച് കഴുത്തു മുറുക്കി കൊല്ലാനായിരുന്നു ശ്രമം.
യുവതിയുടെ ബഹളംകേട്ടെത്തിയ ബന്ധുക്കളും നാട്ടുകാരും ചേര്‍ന്നു രക്ഷിച്ച് കോഴഞ്ചേരിയില്‍ ആശുപത്രിയില്‍ പ്രവേശിപ്പിച്ചു. ഇയാളുമായി പ്രണയത്തിലായിരുന്ന യുവതി രണ്ടര വര്‍ഷം മുമ്പ് വീട്ടുകാരുടെ എതിര്‍പ്പു വകവയ്‌ക്കാതെ ഇയാളോടൊപ്പം വീടുവിട്ടു പോയിരുന്നു. ഇവര്‍ക്ക് ഒന്നര വയസ്സോളം പ്രായമുള്ള ഒരു കുട്ടിയുമുണ്ട്. ഇയാളുടെ മര്‍ദ്ദനത്തില്‍ സഹികെട്ട് മാതാപിതാക്കളുടെയടുത്തു മടങ്ങിയെത്തിയതാണ് ഹര്‍ഷ. അറസ്റ്റു ചെയ്ത സുനീഷിനെ അടൂര്‍ കോടതിയില്‍ ഹാജരാക്കി റിമാന്‍ഡ് ചെയ്തു.
പ്രതികരിക്കാൻ ഇവിടെ എഴുതുക: