കാട്ടാക്കട: കാട്ടാക്കട താലൂക്കിലെ വില്ലേജ് ഓഫീസുകളില് ഭൂമിയുടെ പോക്കുവരവ് നടപടികള് ഇഴയുന്നു. താലൂക്ക് ഓഫീസിലയയ്ക്കുന്ന പോക്കുവരവ് അപേക്ഷകള് ഉേദ്യാഗസ്ഥര് അനാവശ്യമായി തടഞ്ഞുവയ്ക്കുന്നതായാണ് പരാതി. കാട്ടാക്കട താലൂക്കില് സ്വന്തം പേരില് രജിസ്റ്ററാക്കി കിട്ടിയ ഭൂമിയ്ക്ക് നികുതി അടച്ച് കിട്ടാന് ഭൂവുടമകള് നെട്ടോട്ടമോടാന് തുടങ്ങിയിട്ട് കാലങ്ങളേറെ.
വസ്തു ആധാരം രജിസ്റ്റര് ചെയ്തശേഷം സബ് രജിസ്ട്രാര് ഓഫീസുകളില് നിന്നും പോക്കുവരവ് അപേക്ഷ ഓണ്ലൈനായി വില്ലേജ് ഓഫീസുകളിലേയ്ക്ക് അയക്കുകയാണ് പതിവ്. എന്നാല് കഴിഞ്ഞ വര്ഷം നല്കിയ അപേക്ഷകള് പോലും മിക്ക വില്ലേജുകളിലും നടപടിയായില്ല. താലൂക്കാഫീസില് പരാതിപ്പെട്ടിട്ടും ഫലമില്ലെന്നാണ് ആക്ഷേപം. താലൂക്കില് പോക്കുവരവ് സെക്ഷന് കൈകാര്യം ചെയ്യുന്ന ഉദ്യോഗസ്ഥരുടെ അലംഭാവമാണ് പോക്കുവരവ് നടപടികള് നിലക്കാന് കാരണമെന്നാണ് അറിയുന്നത്.
സബ് രജിസ്ട്രാര് ഓഫീസുകളില് കൈമാറ്റം രജിസ്റ്റര്ചെയ്ത് വാങ്ങിയ ഭൂമി വില്ലേജില് നിന്നും പോക്കുവരവ് ചെയ്ത് ഭൂനികുതി അടച്ചുകിട്ടുന്നതിനായി നല്കുന്ന അപേക്ഷകള്ക്ക് റവന്യൂ അധികൃതര് നിഷേധാത്മക നിലപാട് സ്വീകരിച്ചുതുടങ്ങിയതോടെയാണ് പോക്കുവരവ് നപടികള് അവതാളത്തിലായത്. പോക്കുവരവ് ഓണ്ലൈന് സംവിധാനത്തിലായതിനാല് സമയബന്ധിതമായിട്ടു ലഭിക്കുമെന്ന് പറയുന്നെങ്കിലും ഉദേ്യാഗസ്ഥര്ക്ക് വേണ്ടത്ര കമ്പ്യൂട്ടര് പരിജ്ഞാനം ഇല്ലാത്തതും പ്രശ്നമാണ്.
വില്ലേജ് ഓഫീസുകളില് പോക്കുവരവ് അപേക്ഷകള് വൈകിപ്പിക്കുന്ന രീതി അവസാനിപ്പിക്കാന് നടപടി വേണമെന്ന് താലൂക്കാഫീസില് പരാതി നല്കിയെങ്കിലും യാതൊരു നടപടിയും സ്വീകരിച്ചില്ലെന്ന് ഭൂവുടമകള് പറയുന്നു. താലൂക്ക് ആസ്ഥാനത്തെ കുളത്തുമ്മല് വില്ലേജ് ഓഫീസില് ജനുവരിയില് നല്കിയ പോക്കുവരവ് അപേക്ഷകര്ക്ക് പോലും ഭൂനികുതി അടച്ച് നല്കിയിട്ടില്ല.
വില്ലേജ് ഉേദ്യാഗസ്ഥരുടെ കുറവ് കാരണം നടപടിക്രമങ്ങള് വൈകുന്നതെന്നാണ് താലൂക്ക് കേന്ദ്രത്തില് നിന്നും അപേക്ഷകരെ അറിയിക്കുന്നത്. എന്നാല് താലൂക്കാഫീസിലെ ഉദ്യോഗസ്ഥരുടെ അനാസ്ഥയും കെടുകാര്യസ്ഥതയുമാണ് പോക്കുവരവ് നടപടികള് നിലയ്ക്കാന് കാരണമെന്ന് ഒരു വിഭാഗം ഉദ്യോഗസ്ഥര് തന്നെ സമ്മതിക്കുന്നു. അടുത്തിടെ ഭൂമി കൈമാറ്റ രജിസ്ട്രേഷനില് വന്കുറവ് സംഭവിച്ചു. ഇതോടെ പോക്കുവരവ് അപേക്ഷകളുടെയും എണ്ണം കുറഞ്ഞു. എന്നിട്ടും സമയബന്ധിതമായി പോക്കുവരവ് അപേക്ഷകള് തീര്പ്പാക്കാന് അധികൃതര് തയ്യാറാകുന്നില്ല. പോക്കുവരവ് ചെയ്ത് കിട്ടുന്നതിന് താലൂക്ക് ഓഫീസിലേയ്ക്ക് അയക്കുന്ന അപേക്ഷകളും യഥാസമയം നല്കുന്നില്ലെന്ന് പരാതിപ്പെടുന്നവരുടെ അപേക്ഷകള്ക്ക് അനാവശ്യ ചോദ്യങ്ങളുന്നയിച്ച് വട്ടം ചുറ്റിക്കുന്നതായും പരാതിയുണ്ട്.
സബ് ഡിവിഷന് വേണ്ടിവരുന്ന പോക്കുവരവ് അപേക്ഷകള് തഹസീല്ദാര് (ഭൂരേഖ) കൂടി അനുമതി നല്കണം. ഒച്ചിഴയും വേഗത്തിലാണത്രെ ഇതിന്റെ നടപടി ക്രമങ്ങള്. എന്നാല് പോക്കുവരവ് ഓണ്ലൈനിലായതാണ് കാലതാമസം വരുന്നതെന്നും ഇനിയും കാത്തിരിക്കേണ്ടിവരുമെന്നുമാണ് കാട്ടാക്കട താലൂക്കിലെ പോക്കുവരവ് സെക്ഷന് കൈകാര്യം ചെയ്യുന്ന ഉദ്യോഗസ്ഥര് നല്കുന്ന വിശദീകരണം.
താലൂക്ക് ആസ്ഥാനത്തെ കുളത്തുമ്മല് വില്ലേജാഫീസില് 1060 പോക്കുവരവ് അപേക്ഷകള് ലഭിച്ചിട്ടുള്ളതില് 350 ഓളം അപേക്ഷകള് മാത്രമേ തീര്പ്പാക്കാനൂള്ളൂവെന്നും ആധാരങ്ങള് സബ് രജിസ്ട്രാറാഫീസില് നിന്നും ഓണ്ലൈന് വഴി അയക്കുന്നതില് വ്യക്തത വരാത്തതാണ് തീര്പ്പാക്കുന്നതിനു തടസമെന്നുമാണ് തഹസീല്ദാര് ഓഫീസിലെ പോക്കുവരവ് സെക്ഷന് വിഭാഗം പറയുന്നത്.
