അഗളി:അട്ടപ്പാടിയില് വീടിനുള്ളില് ഉറങ്ങിക്കിടന്ന രണ്ടുവയസുകാരിയെ തെരുവ് നായ അക്രമിച്ചു.
താവളം മേലെ കണ്ടിയൂര് ആദിവാസി ഊരില് ജിനേഷിന്റെയും അനിതയുടെയും മകള് ദര്ശനയ്ക്കാണ് തെരുവ് നായുടെ കടിയേറ്റത്. നെറ്റിയിലും, കവിളിലും, വലതുചെവിയ്ക്കും കടിയേറ്റ കുട്ടിയെ തൃശൂര് മെഡിക്കല് കോളേജ് ആശുപത്രിയില് പ്രവേശിപ്പിച്ചു.
ബുധനാഴ്ച രാവിലെ എട്ടുമണിയോടെയാണ് സംഭവം. വീടിനുള്ളില് ഉറങ്ങികിടന്ന ദര്ശനയെ തെരുവ് നായ കടിയ്ക്കുകയായിരുന്നു.കുട്ടിയുടെ കരച്ചില് കേട്ട് ഓടിയെത്തിയ അമ്മയാണ് സംഭവം കാണുന്നത്. ബന്ധുക്കളും ഊരുവാസികളും ചേര്ന്ന് കുട്ടിയെ കോട്ടത്തറ ഗവ. ട്രൈബല് സ്പെഷ്യാലിറ്റി ആശുപത്രിയില് പ്രവേശിപ്പിച്ചു. മുഖത്തേറ്റ പരുക്കുകള് ഗുരുതരമായതിനാല് പ്രാഥമിക ചികില്സ നല്കിയതിനുശേഷം കുട്ടിയെ തൃശൂര് മെഡിക്കല് കോളേജ് ആശുപത്രിയിലേക്ക് മാറ്റുകയായിരുന്നു.
മുറിവുകള് ആഴത്തിലുള്ളതാണെന്ന് ഡോക്ടര്മാര് പറഞ്ഞു. അട്ടപ്പാടിയിലെ വിവിധ ഭാഗങ്ങളില് തെരുവ്നായ ശല്യം രൂക്ഷമാണ്.
