പാലക്കാട്:സംസ്ഥാന സാക്ഷരതാ മിഷന്റെ എട്ടാമത് സംസ്ഥാന തുടര്‍ വിദ്യാഭ്യാസ കലോത്സവത്തിന് മുന്നോടിയായി ഇന്നും നാളെയും ജില്ലാ തുടര്‍വിദ്യാഭ്യാസ കലോത്സവം ആലത്തൂര്‍ ബ്ലോക്ക് ഹാളിലും ആലത്തൂര്‍ ഗവ.ഗേള്‍സ് ഹയര്‍ സെക്കന്‍ഡറി സ്‌കൂളിലുമായി നടത്തുന്നു.
ജില്ലാ പഞ്ചായത്തും ജില്ലാ സാക്ഷരതാ മിഷനും ആലത്തൂര്‍ ബ്ലോക്ക് പഞ്ചായത്തും ജില്ലയിലെ തദ്ദേശസ്വയംഭരണ സ്ഥാപനങ്ങളുടെ സഹകരണത്തോടെയാണ് കലോത്സവം നടത്തുന്നത്. നാല്, ഏഴ്, പത്ത് ,ഹയര്‍ സെക്കന്‍ഡറി തുല്യതാ പഠിതാക്കളുടെയും പ്രേരക്മാരുടെയും സര്‍ഗാത്മഗതയെ പ്രോത്സാഹിപ്പിക്കുന്നതിനാണ് കലോത്സവം നടത്തുന്നത്. ബ്ലോക്ക്തല മത്സരങ്ങളില്‍ പങ്കെടുത്ത് മികച്ച പ്രകടനം കാഴ്ചവെച്ചവരാണ് ജില്ലാതല മത്സരങ്ങളില്‍ പങ്കെടുക്കുന്നത്.
ആലത്തൂര്‍ ബ്ലോക്ക് പഞ്ചായത്ത് ഹാളില്‍ 23ന് രാവിലെ 10 മുതല്‍ രചനാമത്സരങ്ങള്‍ നടക്കും. 24ന് ആലത്തൂര്‍ ഗവ.ഗേള്‍സ് ഹയര്‍ സെക്കന്‍ഡറി സ്‌കൂളില്‍ രാവിലെ ഒമ്പതിന് പി.കെ.ബിജു എം.പി കലോത്സവത്തിന്റെ ഉദ്ഘാടനം നിര്‍വഹിക്കും, ജില്ലാ പഞ്ചായത്ത് പ്രസിഡന്റ് കെ.ശാന്തകുമാരി അധ്യക്ഷയാവുന്ന പരിപാടിയില്‍ സാക്ഷരതാ മിഷന്‍ അസി.ഡയറക്ടര്‍ ഡോ: ജെ.വിജയമ്മ മുഖ്യപ്രഭാഷണം നടത്തും. ജില്ലാ സാക്ഷരതാ മിഷന്‍ കോഡിനേറ്റര്‍ സജി തോമസ് റിപ്പോര്‍ട്ട് അവതരിപ്പിക്കും.
വൈകീട്ട് 5.30ന് നടക്കുന്ന സമാപന സമ്മേളനം കെ.ഡി. പ്രസേനന്‍ എംഎല്‍എ ഉദ്ഘാടനം ചെയ്യും. ജില്ലാ പഞ്ചായത്ത് വൈസ് പ്രസിഡന്റ് ടി.കെ.നാരായണദാസ് അധ്യക്ഷനാവുന്ന പരിപാടിയില്‍ ബ്ലോക്ക് പഞ്ചായത്ത് പ്രസിഡന്റ് സി.കെ.ചാമുണ്ണി മുഖ്യപ്രഭാഷണം നടത്തും.
പ്രതികരിക്കാൻ ഇവിടെ എഴുതുക: