കൊച്ചി: കേരള സംഗീത നാടക അക്കാദമി അധ്യക്ഷയും, നടിയുമായ കെപിഎസി ലളിത റിമാന്ഡില് കഴിയുന്ന നടന് ദിലീപിനെ ജയിലില് സന്ദര്ശിച്ചതില് തെറ്റൊന്നുമില്ലെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. കൊച്ചിയില് വാര്ത്താ സമ്മേളനത്തില് സംസാരിക്കുകയായിരുന്നു അദ്ദേഹം.
ജയിലില് തടവുകാരെ സന്ദര്ശിക്കുന്നത് രാഷ്ട്രീയ പ്രശ്നമായി ഉയര്ത്തികാട്ടേണ്ടതില്ല. വ്യക്തിപരമായ ബന്ധങ്ങളുടെ പേരില് തടവില് കഴിയുന്ന ഒരാളെ കണ്ടതില് എന്ത് തെറ്റാണുള്ളത്. പാര്ട്ടി സമരങ്ങളുടെ പേരില് തങ്ങള് തടവിലായിരുന്നപ്പോള് പാര്ട്ടി വിരുദ്ധര് പോലും സന്ദര്ശിക്കാന് എത്തിയിരുന്നു.
അത് വ്യക്തി ബന്ധങ്ങളുടെ പേരിലാണ്. ദിലീപിനെ സന്ദര്ശിച്ച സംഭവം രാഷ്ട്രീയവത്കരിക്കേണ്ട ആവശ്യമില്ല. കഴിഞ്ഞ ദിവസമാണ് ആലുവ സബ്ജയിലില് എത്തി നടന് ദിലീപിനെ കെപിഎസി ലളിത സന്ദര്ശിച്ചത്.
മന്ത്രി തോമസ് ചാണ്ടിയുടെ വിഷയത്തില് തെറ്റുണ്ടെങ്കില് നിയമാനുസൃതമായി പരിശോധിക്കും. തോമസ് ചാണ്ടി. അനധികൃതമായാണ് റിസോര്ട്ട് നിര്മ്മിച്ചതെന്ന രേഖകള് പുറത്തുവന്നുകൊണ്ടിരിക്കവെയാണ് കോടിയേരിയുടെ പ്രതികരണം.
