കാട്ടാക്കട: മികച്ച പിറ്റിഎക്കുള്ള അവാര്ഡ് പൂവച്ചല് സര്ക്കാര് വൊക്കേഷണല് & ഹയര്സെക്കന്ററി സ്കൂളിന്. സംസ്ഥാന സര്ക്കാരിന്റെ ജില്ലയിലെ 2016-17 അധ്യയനവര്ഷത്തെ ഹൈസ്കൂള് വിഭാഗം മികച്ച പിറ്റിഎക്കുള്ള അവാര്ഡിനാണ് പൂവച്ചല് സര്ക്കാര് സ്കൂള് തെരഞ്ഞെടുക്കപ്പെട്ടത്.
അക്കാദമിക് മേഖലയിലും സാമൂഹിക ഭൗതിക മേഖലയിലും പിറ്റിഎ നടത്തിയ വേറിട്ടതും മാതൃകാപരവുമായ പ്രവര്ത്തനങ്ങളാണ് പുരസ്കാരത്തിന് പരിഗണിച്ചത്. മികവാര്ന്ന പഠനപ്രവര്ത്തനങ്ങള്ക്ക് വേണ്ട ഇടപെടലുകള്, സാന്ത്വന സഹായങ്ങള്, വിവിധമേഖലകളിലെ നിര്മാണ പ്രവര്ത്തനങ്ങള്, ജൈവ പച്ചക്കറിതോട്ടം, പഠിപ്പുമുടക്കില്ലാത്ത കലാലയം, അന്യാധീനപ്പെട്ട സ്കൂള്ഭൂമി തിരിച്ച് പിടിക്കുന്നതിന് നടത്തിയ പ്രവര്ത്തനങ്ങള്, വിവിധ ക്ലബ്ബുകളും എന്എസ്സ്എസ്സ്, സ്കൗട്ട് & ഗൈഡ്, ജൂനിയര് റെഡ്ക്രോസ് തുടങ്ങിയവയുടെ പ്രവര്ത്തനങ്ങള്ക്ക് പിറ്റിഎ നല്കുന്ന സഹായങ്ങള് ഇവയൊക്കെ അവാര്ഡ് ലഭിക്കുന്നതിന് കാരണമായി.
പ്രശംസാപത്രവും അമ്പതിനായിരം രൂപയുമാണ് അവാര്ഡ്. ഈ മാസം വിദ്യാഭ്യാസവകുപ്പിന്റെ പരിപാടിയില് അവാര്ഡ് ഏറ്റുവാങ്ങും. മുമ്പ് നെയ്യാറ്റിന്കര ഉപജില്ലയിലെ ഏറ്റവും നല്ല പിറ്റിഎക്കുള്ള ഇരുപതിനായിരം രൂപയുടെ പുരസ്കാരം സ്കൂളിന് ലഭിച്ചിരുന്നു. പൂവച്ചല് സുധീര് പ്രസിഡന്റും ഹെഡ്മിസ്ട്രസ് ജയന്തിദേവി, ഹയര്സെക്കന്ററി പ്രിന്സിപ്പാള് ആര്. ബിന്ദു, വിഎച്ച്എസ്ഇ പ്രിന്സിപ്പാള് സീമസേവ്യര് എന്നിവര് ഉള്പ്പെടുന്ന പിറ്റിഎ ഭരണസമിതിയാണ് അവാര്ഡിന് അര്ഹത നേടിയത്. ഈ അധ്യയനവര്ഷം മികച്ച പ്രവര്ത്തനങ്ങള്ക്ക് സ്പീക്കര്, വിദ്യാഭ്യാസമന്ത്രി, സഹകരണമന്ത്രി, വൈദ്യുതിമന്ത്രി, എംഎല്എ, കളക്ടര് എന്നിവരില് നിന്ന് 12 ല് പരം അവാര്ഡുകള് സ്കൂളിന് ലഭിച്ചിട്ടുണ്ട്.
