ന്യൂദല്‍ഹി: അന്ധരും പ്രായപൂര്‍ത്തിയാകാത്തവരുമായ മൂന്ന് ആണ്‍കുട്ടികളെ ലൈംഗികമായി പീഡിപ്പിച്ച കേസില്‍ ബ്രിട്ടിഷുകാരന്‍ അറസ്റ്റില്‍. സംഭവവുമായി ബന്ധപ്പെട്ട് മുറെ ഡെനീസ് വാര്‍ഡെന്ന 54 കാരനെ ദല്‍ഹി പോലീസ് അറസ്റ്റ് ചെയ്തു.
നാഷണല്‍ അസോസിയേഷന്‍ ഫോര്‍ ബ്ലൈന്‍ഡ്(എന്‍.എ.ബി) സ്‌കൂള്‍ അന്തേവാസികളാണ് പീഡനത്തിനിരയായ കുട്ടികള്‍. കുട്ടികളെ പീഡിപ്പിച്ചതുമായി ബന്ധപ്പെട്ട ദൃശ്യങ്ങള്‍ മുറെയുടെ ലാപ്ടോപ്പില്‍ നിന്ന് പോലീസ് കണ്ടെടുത്തു. ഇയാളുടെ മൊബൈല്‍ ഫോണും പരിശോധിച്ചു വരികയാണെന്ന് പോലീസ് അറിയിച്ചു.
എന്‍.എ.ബിയുമായി ഒമ്പതു വര്‍ഷത്തെ ബന്ധമുള്ള ആളാണ് മുറെ വാര്‍ഡ്. ഇയാള്‍ സംഘടനയ്‌ക്ക് സംഭാവനകള്‍ നല്‍കിവരുന്നുണ്ട്. ഇതിന്റെ ബലത്തില്‍ സ്‌കൂളിലെ സ്ഥിരം സന്ദര്‍ശകനായിരുന്നു മുറെ എന്ന് സ്‌കൂള്‍ അധികൃതര്‍ പറഞ്ഞു. കഴിഞ്ഞ ഏപ്രില്‍ മുതല്‍ ഗുര്‍ഗാവിലുള്ള സ്വകാര്യ സ്ഥാപനത്തിലാണ് മുറെ ജോലി ചെയ്യുന്നത്.
കുട്ടികളെ ലൈംഗികമായി പീഡിപ്പിച്ചതായി എന്‍.എ.ബിയിലെ ഒരു സ്റ്റാഫ് പോലീസില്‍ അറിയിച്ചതോടെയാണ് സംഭവം പുറത്ത് വരുന്നത്. മുറെ വാര്‍ഡിനെ വസന്ത് കുഞ്ചിലെ വീട്ടില്‍ നിന്ന് അറസ്റ്റ് ചെയ്തതായും ഇയാളെ കോടതിയില്‍ ഹാജരാക്കി റിമാന്‍ഡ് ചെയ്തതായും പോലീസ് വ്യക്തമാക്കി.
പ്രതികരിക്കാൻ ഇവിടെ എഴുതുക: