നിലമ്പൂര്‍: കക്കാടംപൊയിലിലെ പി.വി.അന്‍വര്‍ എംഎല്‍എയുടെ അനധികൃത ചെക്ക്ഡാം പൊളിച്ച് മാറ്റണമെന്നാവശ്യപ്പെട്ട് ബിജെപി ഏറനാട്, തിരുവമ്പാടി നിയോജക മണ്ഡലം കമ്മിറ്റികളുടെ നേതൃത്വത്തില്‍ പാര്‍ക്കിലേക്ക് മാര്‍ച്ചില്‍ പ്രതിഷേധമിരമ്പി.
മാര്‍ച്ചിന് നേരെ പോലീസ് ജലപീരങ്കി പ്രയോഗിച്ചു. നിരവധി പ്രവര്‍ത്തകര്‍ക്ക് പരിക്കേറ്റു. മാര്‍ച്ച് ബിജെപി സംസ്ഥാന ജനറല്‍ സെക്രട്ടറി കെ.സുരേന്ദ്രന്‍ ഉദ്ഘാടനം ചെയ്തു. സംസ്ഥാനം ഭരിക്കുന്നത് പിണറായിയുടെ നേതൃത്വത്തിലുള്ള മാഫിയാ സംഘങ്ങളാണെന്ന് ബിജെപി സംസ്ഥാന ജനറല്‍ സെക്രട്ടറി കെ.സുരേന്ദ്രന്‍. ബിജെപി ഏറനാട്, തിരുവമ്പാടി മണ്ഡലം കമ്മിറ്റികളുടെ നേതൃത്വത്തില്‍ പി.വി.അന്‍വറിന്റെ അനധികൃത പാര്‍ക്കിലേക്ക് നടത്തിയ മാര്‍ച്ച് ഉദ്ഘാടനം ചെയ്യുകയായിരുന്നു അദ്ദേഹം.
പണത്തിന് മുകളില്‍ പിണറായിയും പറക്കില്ലെന്നാണ് തോമസ് ചാണ്ടിയുടെയും പി.വി.അന്‍വറിന്റെയും നേതൃത്വത്തില്‍ നടക്കുന്ന അനധികൃത പ്രവര്‍ത്തികളിലൂടെ വ്യക്തമാകുന്നതെന്നും അദ്ദേഹം പറഞ്ഞു. എല്‍ഡിഎഫും യുഡിഎഫും പി വി അന്‍വറിനെ സഹായിക്കുന്ന നിലപാടാണ് എടുക്കുന്നത്. ആര്യാടനും മകനും ഒറ്റപ്പെട്ട പ്രസ്താവനകള്‍ നടത്തുന്നുണ്ടെങ്കിലും കോണ്‍ഗ്രസിലെയും മുസ്ലീം ലീഗിലെയും ഭൂരിപക്ഷം നേതാക്കളും അന്‍വറിന് പിന്തുണ നല്‍കുന്നവരാണെന്നും അദ്ദേഹം ആരോപിച്ചു.
ഏറനാട് മണ്ഡലം പ്രസിഡന്റ് സോമശേഖരന്‍ അദ്ധ്യക്ഷത വഹിച്ചു. ജില്ലാ സെക്രട്ടറിമാരായ കെ.പി.ബാബുരാജ്, കെ.സി.വേലായുധന്‍, സംസ്ഥാനസമിതിയംഗം അഡ്വ.ടി.കെ.അശോക് കുമാര്‍, യുവമോര്‍ച്ചാ സംസ്ഥാന സെക്രട്ടറി അജി തോമസ്, നിലമ്പൂര്‍ മണ്ഡലം പ്രസിഡന്റ് വിദ്യാധരന്‍ തുടങ്ങിയവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: