കല്‍പ്പറ്റ: കേരളീയരായ കായിക താരങ്ങളെ ഒളിമ്പിക്‌സ് മെഡല്‍ നേടുന്നതിന് സജ്ജരാക്കുവാന്‍ കേരള സ്റ്റേറ്റ് സ്‌പോര്‍ട്‌സ് കൗണ്‍സിലും കേരള സര്‍ക്കാരും സംയുക്തമായി ആവിഷ്‌ക്കരിച്ചിട്ടുള്ള കര്‍മ്മ പദ്ധതിയായ ‘ഓപ്പറേഷന്‍ ഒളിമ്പിയ’ പദ്ധതിയിലേക്ക് ഫെന്‍സിംഗ് താരങ്ങളെ തെരഞ്ഞെടുക്കുന്നു. ആഗസ്റ്റ് 13ന് രാവിലെ ഒന്‍പത് മുതല്‍ തലശ്ശേരി സായ് സെന്ററില്‍ സെലക്ഷന്‍ നടക്കും. തെരഞ്ഞെടുക്കപ്പെടുന്നവര്‍ക്ക് ഇന്ത്യയിലെയും, വിദേശത്തെയും മികച്ച ഫെന്‍സിംഗ് പരിശീലകരില്‍ നിന്നും പരിശീലനം ലഭിക്കും. കൂടാതെ മികച്ച താമസം, ഭക്ഷണം വിദ്യാഭ്യാസം, ദേശീയ-അന്തര്‍ദ്ദേശീയ മത്സരങ്ങളില്‍ പങ്കെടുക്കുന്നതിനുള്ള സൗകര്യം എന്നിവയും ലഭിക്കും.
10 വയസിനും 14 വയസിനും മദ്ധ്യേ പ്രായമുള്ളവര്‍, 14 വയസിനു മുകളില്‍ പ്രായമുള്ളവര്‍ എന്നീ രണ്ടു വിഭാഗങ്ങളിലായിരിക്കും തെരഞ്ഞെടുപ്പ്. 10-14 വിഭാഗത്തില്‍ തുടക്കക്കാര്‍ക്കും പങ്കെടുക്കാം. 14 വയസനു മുകളിലുള്ള വിഭാഗക്കാരുടെ സെലക്ഷന്‍ ട്രയല്‍സിന്റെ മാനദണ്ഡം ഇന്റര്‍ നാഷണല്‍ ഫെന്‍സിംഗ് ഫെഡറേഷന്‍(എഫ്‌ഐഇ) അംഗീകരിച്ചിട്ടുള്ള അന്തര്‍ദ്ദേശീയ ഫെന്‍സിംഗ് ചാമ്പ്യന്‍ഷിപ്പില്‍ മെഡല്‍ നേടിയവര്‍, പങ്കെടുത്തിട്ടുള്ളവര്‍, ദേശീയ വ്യക്തിഗത മത്സരങ്ങളില്‍ മെഡല്‍ നേടിയിട്ടുള്ളവര്‍, ദേശീയ ചാമ്പ്യന്‍ഷിപ്പില്‍ വ്യക്തിഗത ഇനത്തില്‍ നാല് മുതല്‍ എട്ട് വരെ റാങ്കില്‍ ഉള്‍പ്പെട്ടവര്‍, ദേശീയ ടീം ചാമ്പ്യന്‍ഷിപ്പില്‍ മെഡല്‍ നേടിയവര്‍, ദേശീയ തലത്തില്‍ പങ്കെടുത്തിട്ടുള്ളവര്‍, സംസ്ഥാന തലത്തില്‍ സ്വര്‍ണ്ണമെഡല്‍ നേടിയവര്‍ എന്നിങ്ങനെയാണ്. ഫെന്‍സിംഗ് താരങ്ങള്‍ വയസു തെളിയിക്കുന്ന സര്‍ട്ടിഫിക്കറ്റ്, സംസ്ഥാന-ദേശീയ അന്തര്‍ദ്ദേശീയ തലത്തിലുള്ള ഫെന്‍സിംഗ് സര്‍ട്ടിഫിക്കറ്റുകള്‍, ആവശ്യമായ കളിയുപകരണങ്ങള്‍ എന്നിവ സഹിതം ആഗസ്റ്റ് 13ന് രാവിലെ എട്ട് മണിക്ക് തലശ്ശേരി സായ് സെന്ററില്‍ എത്തണം. ഫോണ്‍: 9447980371, 9447189731.
പ്രതികരിക്കാൻ ഇവിടെ എഴുതുക: