തിരുവനന്തപുരം: ഗുരുവായൂര് ക്ഷേത്രത്തില് ദര്ശനത്തിനെത്തിയ വയോധികയെ ജീവനക്കാരന് തള്ളിയിട്ട സംഭവത്തില് സംസ്ഥാന മനുഷ്യാവകാശ കമ്മീഷന് കേസെടുത്ത് ദേവസ്വം അഡ്മിനിസ്ട്രേറ്റര്ക്ക് നോട്ടീസയച്ചു. സംഭവത്തെ കുറിച്ച് വിശദമായ അനേ്വഷണം നടത്തി മൂന്നാഴ്ചയ്ക്കകം വിശദീകരണം സമര്പ്പിക്കണമെന്ന് കമ്മീഷന് അംഗം കെ. മോഹന്കുമാര് നിര്ദ്ദേശം നല്കി.
ജൂലൈ 20 നാണ് പൊന്നാനി എരമംഗലം കിഴക്കേവളപ്പില് കുഞ്ഞിലക്ഷ്മി അമ്മയെ(70) പ്രസാദം വാങ്ങാന് വരിയില് നില്ക്കുമ്പോള് ജീവനക്കാരനായ ശിവശങ്കരന് പിടിച്ചു തള്ളിയത്. നിലത്തുവീണ അമ്മയുടെ തുടയെല്ലില് മൂന്ന് പൊട്ടലുകളാണ് ഉണ്ടായത്. സംഭവത്തെ കുറിച്ച് പരാതി പറയാന് മരുമകള് രത്നത്തിന്റെ സഹോദരന് സുരേഷ്ബാബു ദേവസ്വം അഡ്മിനിസ്ട്രേറ്ററെ കണ്ടെങ്കിലും ഒരു പരാതി എഴുതി തപാലില് അയയ്ക്കാനാണ് നിര്ദ്ദേശിച്ചത്.
തുടര്ന്ന് ഗുരുവായൂര് പോലീസ് സ്റ്റേഷനില് പരാതി നല്കിയെങ്കിലും ആശുപത്രിയില് നിന്നു വിവരം ലഭിക്കാതെ പരാതി സ്വീകരിക്കില്ലെന്ന് പറഞ്ഞ് നിരസിച്ചു. ദേവസ്വം ആശുപത്രിയെ സര്ട്ടിഫിക്കറ്റിനായി സമീപിച്ചെങ്കിലും വീണ് പരിക്കുപറ്റി എന്നാണ് എഴുതി നല്കിയതെന്നും ജീവനക്കാരനായ ശിവശങ്കരനെ രക്ഷിക്കാന് ദേവസ്വം അധികൃതര് ശ്രമിച്ചതായും രത്നം കമ്മീഷന് നല്കിയ പരാതിയില് പറയുന്നു.
