കറാച്ചി: പാക്കിസ്ഥാൻ തെഹ്രിക് ഇ ഇൻസാഫ് ( പിടിഐ ) തലവൻ ഇമ്രാൻ ഖാന് പാർട്ടിയിലെ വനിതാ പ്രവർത്തകരുടെ ഭാഗത്ത് നിന്നും കനത്ത തിരിച്ചടി. മോശമായ തരത്തിലുള്ള മെസേജുകൾ ഇമ്രാൻ ഖാൻ വനിതാ പ്രവർത്തകർക്ക് അയക്കുന്നു എന്ന ഗുരുതരമായ ആരോപണമാണ് ഇപ്പോൾ ഉയർന്ന് വരുന്നത്. പിടിഐയിലെ വനിതാ നേതാവ് അയിഷാ ഗുലാനിയാണ് ഇമ്രാനെതിരെ ആരോപണം ഉന്നയിച്ചത്. തുടർന്ന് അവർ പാർട്ടിയിൽ നിന്നും രാജിവച്ചു.
‘സ്വഭാവദൂഷ്യമുള്ള ഇമ്രാൻ ഖാൻ തനിക്കും മറ്റ് വനിതാ പ്രവർത്തകർക്കും മോശമായ തരത്തിൽ മെസേജുകൾ അയക്കുന്നുണ്ട്, തന്റെ മാനത്തിനാണ് താൻ കൂടുതൽ വില നൽകുന്നത്, അഭിമാനത്തിനും ആദരവിനും കളങ്കം വരുന്ന ഒന്നിനും താൻ മുതിരില്ല’- ഗുലാനി പറഞ്ഞു.
പിടിഐ പാർട്ടിയിൽ സ്ത്രീകൾക്ക് യാതൊരു തരത്തിലുള്ള ബഹുമാനവും ലഭിക്കുന്നില്ല, ബഹുമാനിക്കപ്പെടുന്ന ഒരു സ്ത്രീയും പാർട്ടിയിൽ ഇല്ല എന്നതാണ് സത്യം’- ഗുലാനി വ്യക്തമാക്കി. എന്നാൽ ഗുലാനിയുടെ ആരോപണങ്ങൾ അടിസ്ഥാന രഹിതമാണെന്ന് പിടിഐ വക്താക്കൾ പറഞ്ഞു.
